काठमाडौं (हाम्रो खेलकुद) – नेपाली राष्ट्रिय लिग टोली झापा ११ भारतको सिक्किमा गभर्नर्स गोल्डकप फुटबल प्रतियोगिताको फाइनलमा पराजित भएको छ ।

गान्तोकस्थित पाल्जोर रंगशालामा बिहीबार भएको फाइनलमा झापा मोहमडन स्पोर्टिङ क्लबसँग १–० ले पराजित भएको थियो । १६ औं मिनेटमा मनवीर सिंहले गरेको गोल खेलको निर्णाय बनेको थियो । पहिलो हाफमै बराबरी गोल गर्ने मौका झापाले चुकाएको थियो । पहिलो हाफको इन्जुरी समयको दोस्रो मिनेटमा कर्ण लिम्बुको पेनाल्टी पोस्ट नजिकबाट बाहिरिएको थियो ।

दोस्रो हाफमा पनि टोलीले प्राप्त केही मौकामा गोल गर्न नसकेपछि पहिलो सहभागितामा झापा उपविजेता बनेर फर्कने भएको छ । झापाले ५० हजार भारतीय रुपैयाँ प्राप्त गर्‍यो । त्यस्तै विजेता मोहमडनले उपाधिसहित १ लाख भारतीय रुपैयाँ जित्यो । झापा स्थानिय गान्तोक हिमालयन स्पोर्टिङ क्लबलाई १–० ले हराउँदै फाइनलमा थियो । मोहमडनले पनि सेमिफाइनलमा स्थानियन सिक्किम आक्रमणलाई ३–१ ले हराएको थियो ।

उक्त प्रतियोगितामा नेपालका चर्चित क्लब लक्ष्मी हुन्डाई मनाङ मस्र्याङ्दी, रुस्लान थ्री स्टार क्लब र एनआरटीले पनि सहभागिता जनाइसकेका छन् । थ्री स्टार र एनआरटीले गभर्नस गोल्डकपको उपाधि जितिसकेका छन् ।