एजेन्सी – सुपरस्टार लियोनल मेस्सीले बार्सिलोनासँग २ वर्षको सम्झौता नविकरण गर्ने लगभग निश्चित भइसकेपछि यो सिजन उनको सरुवाको चर्चा सेलाउँदै गएको छ । तथापी पेरिस सेन्ट जर्मेन (पिएसजी) का अध्यक्ष नासिर अल खलिफा अर्जेन्टिनी कप्तान मेस्सीलाई भित्राउन प्रयासरत छन् ।

गत सिजन मेस्सीले सरुवाका लागि बार्सिलोनालाई आग्रह गर्दै पत्र लेखेका थिए । तर त्यति बेला क्लबसँग थप विवाद हुने देखिएपछि सम्झौता अवधि सम्म त्यहि रहने निर्णय गरेको थिए । अहिले परिस्थिति बदलिएको छ । जुनको अन्त्यमा अहिलेको सम्झौता सकिने भएपनि उनी नयाँ सम्झौताको तयारीमा रहेको समाचार आइरहेका छन् । गएको जनवरीबाट मेस्सी फ्रि ट्रान्सफरका लागि उपलब्ध भइसकेका थिए ।

‘मेस्सी मात्र होइन, हरेक उत्कृष्ट खेलाडी पिएसजी आउन चाहन्छन् । तर सबैलाई एकै पटक सम्झौता गर्न सम्भव छैन,’ खलिफाले भने, ‘किनकी हामीसँग उत्कृष्ट खेलाडी छन् । मेस्सी भनेका मेस्सी हुन् । उनी उत्कृष्ट खेलाडी हुन् ।’

खलिफाले मेस्सीका विषयमा बार्सिलोनाका नयाँ अध्यक्ष जोन लापोर्टासँग पनि कुराकानी भएको बताएका छन् । उनले भने, ‘मेस्सीको सम्झौता टुंगिने क्रममा रहेकोले सबै क्लबले जनवरी १ बाट उनलाई भित्राउन प्रयास गर्न पाउने थिए । हामी पनि त्यसका लागि प्रयास गर्नेछौं भनेर मैले बार्सिलोनाका अध्यक्षलाई पनि भनेको थिए ।’

सञ्चारमाध्यममा मेस्सीले सम्झौता नविकरण गर्ने बताइरहँदा उनी आफैले भने यो विषयमा केहि बोलेका छैनन् । बार्सिलोना र उनीबीच दुई वर्षको सम्झौता नविकरण हुने सम्भावना रहेको बताइएको छ ।