एजेन्सी – पोर्चुगल तथा युभेन्ट्सका सुपर स्टार क्रिस्टियानो रानाल्डोका नाममा थुप्रै कीर्तिमान छ । उनको कप्तानीमा पोर्चुगल युरोपियन च्याम्पियनसिपको तयारीमा रहेको छ । च्याम्पियनसिपको तयारीका क्रममा भएको अन्तिम खेलमा पोर्चुगलले इजरायललाई मंगलबार ४–० ले हराएको थियो ।

पहिलो र दोस्रो हाफमा समान २ गोल भएको खेलमा रोनाल्डोले एक गोल गरेका थिए । मध्यान्तरको केहि अघि गोल गरेका रोनाल्डो अलि दाईको सर्वाधिक अन्तर्राष्ट्रिय गोलको बराबरीको नजिक पुगेका छन् ।

आफ्नो १ सयौं ७५ खेलमा रोनाल्डोले मंगलबार १ सय ४ अन्तर्राष्ट्रिय गोल पुर्याए । रोनाल्डो अब अली दाईको गोलभन्दा ५ गोलले मात्र पछाडि छन् । इरानी दाईको नाममा १ सय ९ गोल रहेको छ ।

म्यानचेष्टर युनाइनेडका मिडफिल्डर ब्रुनो फर्नान्डेसको गोलमा पोर्चुगलले ४२ औं मिनेटम अग्रता लिएको थियो । त्यसको दुई मिनेट पछि रोनाल्डोले गोल गरेका थिए । ८६ औं मिनेटमा गोन्कालो गुइडेसले तथा फर्नान्डेसले इन्जुरी समयको पहिलो मिनेटमा अर्को गोल थप्दै टोलीलाई फराकिलो जित दिलाएका थिए ।

युरोपियन च्याम्पियनसिपमा पोर्चुगल ग्रुप अफ डेथ मानिएको समूहमा छ । जसमा हंगेरी, जर्मनी र फ्रान्स रहेका छन् । हंगेरीविरुद्ध उत्रदै मंगलबार पोर्चुगलले च्याम्पियनसिपको सुरुवात गर्नेछ ।