एजेन्सी – अर्जेन्टिनी राष्ट्रिय फुटबल टोलीका कप्तान लिओनेल मेस्सीले अर्जेन्टिना कहिल्यै पनि आफ्नै भरमा मात्र कहिल्यै नरहेको अभिव्यक्ति दिएका छन् ।

मेस्सीले कोपा अमेरिकामा अर्जेन्टिनाको खेलअघि बोल्ने क्रममा टोलीको तयारी राम्रो रहेको बताएका छन् । क्लब स्तरमा सम्भव सबै उपाधि जितेका उनले राष्ट्रिय टोलीबाट भने उपाधि जित्न सकेका छैनन् । यसपटक उनलाई अर्जेन्टिनाबाट कोपा अमेरिका जित्दै उपाधि खडेरी तोड्ने लक्ष्य छ ।

‘राष्ट्रिय टोली कहिले पनि मेरो भरमा खेलेको छैन । हामी सधैं एकवद्ध भएर कसरि बलियो प्रदर्शन गर्ने भन्ने लक्ष्यमा हुन्छौं,’ मेस्सीले भने, ‘हामीलाई थाहा छ यदि टोली बलियो छैन भने लक्ष्य प्राप्त गर्न कठिन हुन्छ ।’

‘हामी लामो समयदेखि एकवद्ध भएर सँगै खेलिरहेका छौं । हामीले कोपा अमेरिकाको अनुभव पनि बटुलेका छौं । त्यो अनुभवले पनि प्रतियोगितामा हामीलाई केहि सहज हुन्छ । हामी अहिले प्रशिक्षणमा छौं र मलाई लाग्छ हामी सहि पथमा छौं,’ फरवार्ड मेस्सीले थपे ।

‘राष्ट्रिय टोलीबाट खेल्नु सधैं विशेष हुने गर्छ । चाहे त्यो मैत्रीपूर्ण होस्, छनोट, कोपा वा विश्वकप नै किन नहोस्, सबै क्षण महत्त्वपूर्ण हुन्छ । मैले कहिले पनि राष्ट्रिय टोलीबाट यति धेरै खेल्छु भन्ने सोचेको थिइनँ,’ उनले भने, ‘मैले हरेक दिन यस क्षणमा आनन्द महसुस गरेको छु । म सधैं टोलीका लागि आफ्नो उत्कृष्ट प्रदर्शन गर्न तल्लिन छु ।’

अर्जेन्टिनाले सोमबार चिलीविरुद्ध कोपा अमेरिकाको पहिलो खेल खेल्दैछ । अर्जेन्टिना सन् २०१५ र २०१६ को फाइनलमा चिलीसँग नै पराजित भएको थियो । यसपटक प्रतियोगिताको समूह चरणबाट २ टोली मात्र बाहिरिने भएपनि मेस्सीले राम्रो सुरुवात पाउनु महत्त्वपूर्ण रहने बताएका छन् ।

‘हामीलाई महत्त्वपूर्ण जितको खाँचो छ । हामी सुधार गर्ने क्रममा छौं र पहिलो खेलमा जित आवश्यक छ । हामीलाई आउने खेलका लागि यसले मनोबल उच्च पार्छ,’ उनले भने, ‘खेल कठिन हुनेछ । हामी चिलीविरुद्ध फेरी खेल्दैछौं । हामी एक अर्काको बारेमा राम्रोसँग जान्दछौं र खेल प्रतिस्पर्धात्मक हुनेछ ।’