एजेन्सी – फिफा विश्वकप २०२२ तथा एसियन कप २०२३ छनोट अन्तर्गत समूह चरणको अन्तिम खेलमा अष्ट्रेलियाले जोर्डनमाथि १-० को जित दर्ता गरेको छ ।

अष्ट्रेलियाको जितमा डिफेन्डर ह्यारी सुटरले हेडरमार्फत खेलको ७७ औं मिनेटमा गरेको गोल नै निर्णायक सावित भयो । मिलोस डेगेनेकको कर्नरमा उनले हेडरमार्फत गोल गर्दै अष्ट्रेलियालाई अग्रता दिलाएका थिए । सुटरको यो अन्तर्राष्ट्रिय करिअरको छैटौं गोल हो । उनले हालसम्म ५ खेल मात्र खेलेका छन् ।

यस जितसँगै अष्ट्रेलियाले समूहमा शत प्रतिशत जितको नतिजासहित एसियन कपमा छनोट भएको छ । अष्ट्रेलियाको ८ खेलमा २४ अंक छ । अष्ट्रेलियाको यस जितले जोर्डन र कुवेतबीच दोस्रो स्थानको लागि पनि प्रतिस्पर्धा थप चुलिएको छ । जोर्डन १४ अंकसहित दोस्रो स्थान तथा कुवेत ११ अंकसहित तेस्रो स्थानमा छ ।

कुवेतले अन्तिम खेलमा जित हासिल गरेमात्र पनि गोलअन्तरका आधारमा जोर्डनलाई पछि पार्नेछ । कुवेत र चाइनिज ताइपेइको खेल आज नै केहीबेरमा सुरु हुनेछ ।

नेपाल समूहको चौथो स्थानमा रहने यसअघि नै पक्का भइसकेको छ । नेपालले ८ खेलमा २ जित र ६ हारसहित ६ अंक जोडेको थियो । नेपालले अब एसियन कप छनोटको तेस्रो चरणमा पुग्न प्लेअफ चरण पार गर्नुपर्नेछ । नेपालसँगै पुछारको चाइनिज ताइपेइ प्लेअफ खेल्नेछ ।