एजेन्सी – कोपा अमेरिका कपको समूह चरणको खेलमा साविक विजेता ब्राजिलले शुक्रबार बिहान पेरुको सामना गर्दैछ । खेल रियो दि जेनेरियोस्थित स्टेडियो निल्टन सान्तोषमा नेपाली समयअनुसार शुक्रबार बिहान ५:४५ बजे हुनेछ ।

यो खेललाई २०१९ को फाइनलको रिप्लेको रुपमा हेरिएको छ । त्यसबेला ब्राजिलले पेरुलाई ३–१ ले हराउँदै उपाधि जितेको थियो । ब्राजिल समूह चरणमा लगातार दोस्रो जित निकाल्दै क्वाटरफाइनल पुग्ने सम्भावनालाई बलियो बनाउने लक्ष्यमा हुदा पेरु प्रतियोगितामा पहिलो खेल खेल्दैछ ।

ब्राजिलसँग स्टार फरवार्ड नेयमार, गाव्रियल जेसस, रिचार्लीसन, क्यासमिरो, मार्किन्हस, इडर मिलिसाओ, डानिलो र गोलरक्षक एलिसन बेकरको साथ रहेको छ । यस्तै रेनान लोडी, फ्रेड, गाब्रिएल बार्बाेसा, एभर्टन रिवेइरो, भिनिसियस जुनियर, रोबर्टाे फिर्मिनो र थियागो सिल्भा पनि टोलीमा रहेका छन् ।

यता, पेरु पनि ब्राजिललाई पराजित गर्दै समूहमा पहिलो जितको लक्ष्यमा हुनेछ । टोलीसँग जियानलुका लापुडुला, क्रिस्टियन कुभा, सर्जियो पिना, रेनाटो तापिया, मार्काेस लोपेज, लुइस एडभिनकुला र गोलरक्षक पेड्रो गाल्लेसको साथ रहेको छ ।

यि दुई टोलीको पछिल्लो ८ भेटमा ब्राजिल ६ खेलमा विजयी भएको छ । दुई खेल पेरुले जितेको छ । २०१९ को कोपापछि यि दुई टोलीले दुई खेल खेल्दा दुवै टोलीले समान एक जित हात पारेका छन् । ११ सेप्टेम्वर २०२० मा को मैत्रीपुर्ण खेलमा पेरुले ब्राजिललाई १–० ले हराउद्या १४ अक्टोवर २०२० को विश्वकप छनोटमा ब्राजिलले ४–२ को जित निकालेको थियो ।

ब्राजिल पछिल्लो सात खेलमा अपराजित छ । पेरुले पछिल्लो ६ खेलमा एक मात्रै जित निकालेको छ । पेरुले दुई साताअघि विश्वकप छनोटमा इक्वेडरलाई २–१ ले हराएको थियो ।

यही समूहको अर्काे खेलमा शुक्रबार बिहान २ः४५ बजे कोलम्वियाले भेनेजुएलासँग प्रतिस्पर्धा गर्दैछ । कोलम्विया लगातार दोस्रो जितको खोजीमा रहँदा भेनेजुएला पहिलो जितको खोजीमा हुने छ । कोलम्वियाले इक्वेडरलाई १–० ले पराजित गर्दा भेनेजुएलाले ब्राजिलसँग ३–० को हार बेहोरेको थियो ।