काठमाडौं (हाम्रो खेलकुद) – राष्ट्रिय महिला टोली तथा एपिएफकी फरवार्ड सावित्रा भण्डारी सम्बा चोट लागेको ५ महिना भन्दा बढी समयपछि घुँडाको शल्यक्रिया र रिह्याबिलिटेसनका लागि कतार जाने निश्चित भएको छ । अखिल नेपाल फुटबल संघ (एन्फा) का अनुसार शनिबार उनी कतार जानेछिन् ।

गत वर्ष फागुन ३ गते राष्ट्रिय महिला लिग खेल्ने क्रममा दायाँ घुँडामा गम्भिर चोट लागेको थियो । अर्को विभागिय टोली नेपाल पुलिस क्लबविरुद्धको खेलका क्रममा उनी घाइते भएकी थिइन् । पुलिसविरुद्ध खेलको ७९ औं मिनेटमा सम्बाले मैदान छाडेकी थिइन् । साम्बाले गोलको लागि प्रयास गर्दा चोट लागेको थियो । उनको दायाँ घुँडाको एन्टेरिएर क्रुसिएट लिगामेन्ट (एसीएल) मा गम्भीर चोट लागेको थियो ।

विपक्षी गोलकिपर अघि बढेको मौकामा बल चिप गर्ने प्रयासमा ल्यान्डिङका क्रममा उनको घुडाँमा चोट लागेको थियो । चोट लाग्नुअघि लिगको १० खेलमा साम्बाले ४३ गोल गरेकी थिइन् । सावित्रा लिगको उत्कृष्ट फरवार्ड चुनिएकी थिइन् । सावित्राको चाहना अनुसारलाई एन्फाले कतारमा उनको उचारको व्यवस्था मिलाएको हो ।

कतार फुटबल संघको सहयोगमा विमल घर्तिमगर र विक्रम लामाको जस्तै सावित्राको शल्यक्रिया हुनेछ । विमल अहिले पनि कतारमै छन् भने विक्रम फर्किसकेका छन् । सावित्राले घुडाँको नियमित फिजियोथेरापी गरिरहेकी छन् । विश्व खेलकुदमै ख्याती प्राप्त कतारस्थित अस्पेटारमा सावित्राको शल्यक्रिया हुनेछ ।

राष्ट्रिय फुटबल टोलीबाट सर्वाधिक ३८ गोल गरेकी सावित्राको झन्डै ७ वर्षे खेल जीवनमा यति गम्भिर चोट पहिलो पटक हो । सावित्रा नेपालको मात्र नभई दक्षिण एसियाकी उत्कृष्ट फरवार्डमा परिचित छिन् । उनले इन्डियन लिग (आई लिग) दुई फरक क्लबबाट खेलेकी छिन् । दुवै पटक उनी खेलेको टोली आइ लिग च्याम्पियन बनेको थियो । गत वर्ष गोकुलमलाई च्याम्पियन बनाउन महत्वपूर्ण भूमिका निर्वाह गरेकी उनी आइ लिगको सर्वाधिक गोलकर्ता पनि बनेकी थिइन् ।