एजेन्सी – बार्सिलोनाका कप्तान लिओनल मेस्सी बिहीबार ३४ औं वर्षमा प्रवेश गरेका छन् । उनको जन्मोत्सवलाई बार्सिलोनाले खेर जाने कुरै भएन । आफ्नो कप्तानको जन्म दिनमा टोलीले शुभकामना दिएको छ ।

मेस्सीले आफ्नो खेल जीवनमा गरेको उत्कृष्ट गोलहरुको भिडियो सामाजिक सञ्जालमा राख्दै बार्सिलोनाले मेस्सीलाई जन्म दिनको शुभकामना दिएका छ । जसले क्लब र उनका समर्थकका लागि जोडिने एउटा माध्यम बनेको छ । अहिलेको बार्सिलोनासँग मेस्सीको सम्झौता केहि दिन मात्र बाँकी छ । यस्तोमा टोलीले उनीसँगको सम्झौता नविकरण हुनेमा आशा राखेको छ ।

बार्सिलोनाका अध्यक्ष जोन लापोर्टा मेस्सीको जन्म दिनको दिन आफ्ना कप्तान क्लबमै रहने घोषणा गर्न चाहन्थे । तर अहिले सम्म सम्झौतामा हस्ताक्षर भइनसकेकोले त्यो अवसर भने मिलेन । जुन ३० मा मेस्सीको सम्झौता सकिनुअघि उनी नयाँ सम्झौता चाहन्छन् । जुन ३० पछि भने मेस्सी फ्री एजेन्टमा उपलब्ध हुनेछन् ।

लापोर्टाले व्यक्तिगत रुपमा पनि मेस्सीका एजेन्ट समेत रहेका उनका पिता जोर्गे मेस्सीसँग छलफल गरेका छन् । जसले उनी सम्झौता नविकरण हुनेमा आशावादी छन् । झन्डै २ दशकदेखि क्लबको हिस्सा रहेका मेस्सीले दुई वर्षका लागि सम्झौता नविकरण गर्ने आशा राखेको छ । यद्दपी पेरिस सेन्ट जर्मेनसहित केहि टोलीले उनलाई आकर्षक प्रस्ताव दिइरहेका छन् । यद्दपी त्यसका वावजुद उनी क्लबमै रहनेमा बार्सिलोना विश्वस्त रहेको बताइएको छ ।