काठमाडौं (हाम्रो खेलकुद) – नेपाली राष्ट्रिय महिला टोली तथा विभागीय नेपाल एपिएफकी फरवार्ड सावित्रा भण्डारी ‘साम्वा’ घुँडाको उपचारको लागि शनिबार कतारको दोहा प्रस्थान गरेकी छिन् ।

चोट लागेको झन्डै पाँच महिना लामो समयपछि घुँडाको शल्यक्रिया र रिह्याबिलिटेसनका लागि कतार प्रस्थान गरेकी हुन् । उनी शनिबार नेपाल वायुसेवा निगमको जहाजबाट प्रस्थान गरेकी हुन् । अखिल नेपाल फुटबल संघ (एन्फा) ले सावित्रालाई बुधबार नै बिदाई गरेको थियो । सावित्राको चाहनामा एन्फाले कतारमा उनको उचारको व्यवस्था मिलाएको हो ।

कतार फुटबल संघको सहयोगमा पछिल्लो समय विमल घर्तिमगर र विक्रम लामाको जस्तै सावित्राको शल्यक्रिया पनि अब कतारमा हुनेछ । विमल अहिले पनि कतारमै छन् भने विक्रम फर्किसकेका छन् । सावित्राले घुडाँको नियमित फिजियोथेरापी गरिरहेकी छन् । विश्व खेलकुदमै ख्याती प्राप्त कतारको दोहास्थित अस्पेटारमा सावित्राको शल्यक्रिया हुनेछ ।

सावित्राले गतवर्ष ३ फागुनमा राष्ट्रिय महिला लिग खेल्ने क्रममा दायाँ घुँडामा गम्भिर चोट बोकेको थियो । उनले अर्काे विभागीय टोली नेपाल पुलिस क्लबविरुद्धको खेलका क्रममा उनी घाइते भएकी थिइन् । पुलिसविरुद्ध खेलको ७९औं मिनेटमा साम्वाले मैदान छाडेकी थिइन् । साम्बाले गोलको लागि प्रयास गर्दा चोट लागेको थियो ।

उनको दायाँ घुँडाको एन्टेरिएर क्रुसिएट लिगामेन्ट (एसीएल) मा गम्भीर चोट लागेको थियो । विपक्षी गोलकिपर अघि बढेको मौकामा बल चिप गर्ने प्रयासमा ल्यान्डिङका क्रममा उनको घुडाँमा चोट लागेको थियो । चोट लाग्नुअघि लिगको १० खेलमा सावित्राले ४३ गोल गरेकी थिइन् । सावित्रा लिगको उत्कृष्ट फरवार्ड चुनिएकी थिइन् ।

उनले राष्ट्रिय फुटबल टोलीबाट सर्वाधिक ३८ गोल गरेकी छिन् । सावित्रा नेपालको मात्र नभई दक्षिण एसियाकी उत्कृष्ट फरवार्डमा परिचित छिन् । उनले इन्डियन लिग (आई लिग) दुई फरक क्लबबाट खेलेकी छिन् । दुवैपटक उनी खेलेको टोली आइ लिग च्याम्पियन बनेको थियो । गत वर्ष गोकुलमलाई च्याम्पियन बनाउन महत्वपूर्ण भूमिका निर्वाह गरेकी उनी आइ लिगको सर्वाधिक गोलकर्ता पनि बनेकी थिइन् ।

उपचारमा व्यस्त हुनुपर्ने भएपछि सावित्राले घरेलु मैदानमा आयोजना १३ देखि २५ सेप्टेम्बर (२८ भाद्रदेखि ९ असोज) मा हुने भनिएको एएफसी महिला एसियन कप २०२२ को छनोट चरणको खेल गुमाउनेछन् । नेपाल समूह ‘एफ’ मा रहेको छ । नेपालसँगै हङकङ र फिलिपिन्स एकै समूहमा रहेका छन् ।