एजेन्सी – युरो कपबाट बाहिरिएपछि वेल्सका कप्तान ग्यारेथ बेलले आफ्नो भविष्यका बारेमा बताउन चाहेनन् । रियल म्याड्रिडका फरवार्डलाई भविष्यका बारेमा सोधिएको प्रश्नमा उनी मौन रहे ।

बेलको कप्तानीमा रहेको वेल्सको यसपटक युरो कपको यात्रा अन्तिम १६ मा टुंगियो । डेनमार्कसँग ४–० ले पराजित हुँदै वेल्सको यात्रा टुंगिको हो । यसपटकको युरो कप उनको अन्तर्राष्ट्रिय खेल जीवनको अन्तिम हुने अडकलबाजी पनि भएका थिए । उनले देशका लागि ९६ खेल खेलिसकेका छन् ।

बेलको अन्तर्राष्ट्रिय खेल जीवन

वेल्सबाट उनले सन् २००६ मा डेब्यू गरेका थिए । २०१३ मा विश्व का सबैभन्दा महंगा खेलाडकिा रुपमा बेल टोटेनहमबाट रियल पुगेका थिए । अब देशका लागि एक सय खेल संख्या पुग्नबाट अब ४ खेल मात्र बाँकी छ । तर त्यो कोसेढुंगा पार गर्छन् गर्दैनन् भन्ने अनेक शंका उठेका छन् ।

१८ महिनापछि फुटबलको अर्को महत्वपूर्ण प्रतियोगिता विश्व कप कतारमा आयोजना हुँदैछ । ३१ वर्षे बेलले त्यो विश्व कप सम्म खेल्ने सम्भावना पनि छ । तर त्यसका लागि टोलीले छनोट हुने पर्नेछ । अब २ खेलबाट ३ अंक जोड्न सके वेल्सले विश्व कप खेल्नेछ ।

बेलले देशका लागि ३३ गोल गरेका छन् । अन्य कुनै पनि खेलाडीले त्यति गोल गरेका छैनन् । उनी सम्मलित टोली युरोको अघिल्लो संस्करणमा सेमिफाइनलमा पुगेको थियो । तर यसपटक भने टोली अन्तिम १६ बाट नै बाहिरिएको छ ।

डेनमार्कसँगको हारमा बेलले के भने

वेल्सले १० खेलाडीमा सिमित हुँदै डेनमार्कविरुद्धको खेलको अन्त्य गरेको थियो । ह्यारी विल्सनले रातो कार्डको सामना गरेका थिए । ‘हामीले चाहे जस्तो खेल हुन सकेन । सुरुवात राम्रै भएको थियो । तर पछि खेल परिवर्तन भयो । दोस्रो हाफमा हामीले कोशिस गरेका थियौं’, उनले भने’, तर केहि गल्ति भए जसले गर्दा हामी खेलमा फर्कन सकेनन् ।’

बेलले अन्त्यमा भने, ‘हामी निराशजनक रुपमा बाहिरिएका छौं । खेलाडीहरु दिग्दार भएका छन्, रिसाएका छन् । त्यो बुझ्न सकिन्छ । हामीले मौका गुमायौं । तर हामीले जति गर्नुपर्ने हो त्यति सकेनौं । तथापी मलाई टोलीमा गर्व छ ।’