एजेन्सी – युरो कपमा उच्च प्रदर्शन गर्नेमा फ्रान्सेली एन्टोइन ग्रिजमन पनि पर्दछन् । बार्सिलोनामा परेको आर्थिक संकटका कारण क्लबमा उनको भविष्यलाई लिएर चर्चा सुरु भइराख्दा ग्रिजमनले युरो कपमा एकरुपताको प्रदर्शन गरिरहेका छन् ।

फ्रान्स टोलीबाट जर्मनी, हंगेरी र पोर्चुगलविरुद्ध उत्रेका ग्रिजमनले २ सय ६७ मिनेट मैदानमा बिताइसकेका छन् । जसमा ५ सट प्रहार गरेका उनले १ गोल गरेका छन् भने उनको ८५ प्रतिशत पास पूरा भएका छन् । ला लिगा खेल्ने कम खेलाडीले युरो कपमा गोल गर्दा त्यसमा ग्रिजमन छन् ।

रोनाल्ड कोम्यानको नेतृत्वमा गत सिजन बार्सिलोनामा खेल्ने मध्ये युरोमा सर्वाधिक समय खेल्ने मध्ये ग्रिजमन तेस्रोमा पर्दछन् । बार्सिलोनाका लागि गत सिजन सर्वाधिक गोल गर्ने सुचीमा लिओनल मेस्सी पछि उनी दोस्रो नम्बरमा छन् । ग्रिजमनले १२ गोलमा एसिस्ट गरेका थिए ।

अहिलेको अवस्थामा बार्सिलोनालाई पैसाको आवश्यकता छ । त्यसका लागि ग्रिजमनलाई विक्री गर्नु टोलीका लागि एउटा राम्रो विकल्प हुन सक्दछ । चर्को पारिश्रमिकका वावजुद उनको प्रदर्शनबाट भने टोली खुसी छ । ग्रिजमनको बर्हिगमनले पनि टोलीको फरवार्ड लाइनमा भने समस्या नपर्ने देखिन्छ । सर्जियो अगुएरो र मेम्फिस डिपाए फ्री ट्रान्सफरमा आउनुले बार्सिलोनाको आक्रमण मजबुत भएको छ ।

त्यसैले पनि टोलीले उनलाई ठूलो रकममा बेच्न प्रयास गर्ने सम्भावना पनि छ । तर त्यसका लागि प्रस्ताव कसरी आउँछ भन्ने हो । दुई सिजन अघि बार्सिलोनाले १ सय २० मिलियन युरोमा उनलाई भित्राएको थियो । अहिले उनी पनि क्याम्प नोउमा खुसी रहेको बताइन्छ ।