काठमाडौं (हाम्रो खेलकुद)– राष्ट्रिय फुटबल टोलीका कप्तान एवंम् गोलकिपर किरण चेम्जोङले व्यवसायिक खेल जीवनमा एक पछि अर्को सफलता प्राप्त गरिरहेका छन् । ५ वर्षयता विदेशमा लिग खेल्दै आएका किरणले गत सिजन भारतीय लिग अर्थात आई लिग खेलेका थिए ।

लिगकै उत्कृष्ट गोलकिपर समेत चुनिएका किरण फ्यानको नजरमा पनि उत्कृष्ट चुनिएका छन् । उनले २०२०/२१ सिजनको फ्यान्स गोलकिपर अफ दि सिजन अवार्ड प्राप्त गर्ने सोमबार घोषणा भएको छ। । राउन्डग्लास पञ्जाब एफसीबाट खेलेका किरणले खेलेका १४ मध्ये ७ खेलमा क्लिन सिट राखेका थिए । त्यस्तै उनले सबै खेलमा गरि ५६ वटा प्रहार जोगाएका थिए । उनले ८२ प्रतिशत बल जोगाएका थिए ।

समर्थकको नजरमा आई लिगको उत्कृष्ट गोलकिपर चुनिएपछि किरणले सामाजिक सञ्जालमार्फत आफूलाई समर्थन गर्ने सबैलाई धन्यवाद दिएका छन् । समर्थक विना आफ्नो यात्रा शून्य रहने उल्लेख गर्दै किरणले आफू सधै समर्थकको साथले सफल भएको जनाएका छन् ।

किरण नेपाल, भारत र माल्दिभ्स तीन देशकै लिग च्याम्पियन बनिसकेका छन् । लामो समय थ्री स्टारबाट खेलेका किरणले त्यसपछि माल्दिभ्स र पछिल्लो दुई वर्षदेखि आई लिगमा खेल्दै आएका छन् । जेठ १ गते सम्पन्न देशको पहिलो फ्रेन्चाईज फुटबल नेपाल सुपर लिग (एनएसएल) उनले धनगढी एफसीबाट खेलेका थिए । धनगढी दोस्रो भएको एनएसएलमा किरण उत्कृष्ट गोलकिपर चुनिएका थिए ।

उनको कप्तानीमा हालै मात्र नेपाली टोलीले विश्व कप र एसियन कप छनोटको ३ खेल खेलेका फर्केको थियो । कुवेतमा भएको ३ खेलमध्ये चाइनिज ताइपेलाई २– ० ले हराएको भ्रमणमा नेपाली टोली बाँकी दुई खेलमा जोर्डन र अष्ट्रेलियासँग समान ३–० ले पराजित भएको थियो । कुवेत जानुअघि नेपालले इराकविरुद्ध खेलेको मैत्रीपूर्ण खेल ६–२ ले गुमाएको थियो ।