एजेन्सी – फ्रान्सेली क्लब पेरिस सेन्ट जर्मेन (पिएसजी) रियल म्याड्रिडका पूर्व कप्तान सर्जियो रामोसलाई भित्राउने प्रयासमा जुटेको छ । रियलसँगको उनको सम्झौता औपचारिक रुपमा बुधबार (जुन ३०) बाट समाप्ती हुँदैछ । त्यो सम्झौताबाट मुक्त भएसँगै पिएसजी उनलाई लिने तयारीमा देखिन्छ ।

रियलका अध्यक्ष फ्लोरिन्टिनो पेरेजले रामोसलाई एक वर्षको सम्झौता नविकरणका लागि प्रस्ताव गरेपनि उनले त्यसलाई अस्वीकार गरेको यसअघि नै प्रष्ट पारिसकेका छन् । रामोस कम्तीमा दुई वर्षको सम्झौता चाहन्थे ।

सञ्चारमाध्यमका अनुसार रामोस र पिएसजीका प्रतिनिधिबीच पछिल्लो केहि दिनमा छलफल चलिरहेको र सम्झौताबाट उनीहरु टाढा नरहेको जनाएको छ । यद्दपी रामोस पिएसजीसँग पनि दुई वर्षकै सम्झौता चाहिरहेको बताइएको छ ।

पिएसजीले पनि सुरुवाती रुपमा ३५ वर्षे सेन्ट्रल डिफेन्डरसलाई एक वर्षकै सम्झौता गर्न चाहिर रहेको छ । तर रामोस भने कम्तीमा एउटा क्लबमा दुई सिजन बिताउन चाहन्छन् । रामोसलाई भित्राउन पिएसजीबाहेक अन्य दुई क्लब पनि इच्छुक रहेको बताइएको छ ।

पिएसजी र रामोसबीच एक वर्षको सम्झौता हुने र दोस्रो विकल्पका रुपमा अर्को सिजन पनि रहन सक्ने उल्लेख हुने अनुमान गरिएको छ । आर्थिक पाटो भने सम्झौताको बाधक नरहेको जनाएको छ ।

पिएसजीका स्पोर्टिङ डाइरेक्टर लियोनार्दो रामोसलाई ल्याउनेमा दृढ देखिएका छन् । तर रामोस पिएसजीमा आबद्ध भएपनि नियमित पहिलो रोजाईमा पर्नेमा भने निश्चित हुने छैन । माउरिसियो पोचेटिनोको टोलीमा प्रेनल किम्पेम्बा र मार्किन्हस टोलीको पहिलो रोजाईका डिफेन्डर हुन् ।

बुधबारबाट औपचारिक रुपमा रामोस सम्झौता मुक्त हुने भएपछि रियलले उनलाई जुन १७ मै विदाई गरेको थियो । त्यसपछि रामोसको भविष्यलाई लिएर अनेक अडकलबाजी सुरु भएका थिए । तर अब उनी पिएसजीको जर्सीमा देखिने सम्भावना बढेर गएको छ ।