एजेन्सी – ब्राजिली फरवार्ड गाब्रियल जेससले कोपा अमेरिका कप अन्तर्गत अर्जेन्टिनाविरुद्धको फाइनल खेल पनि गुमाउने भएका छन् । दक्षिण अमेरिकी फुटबल संघ (कन्मेवल) ले जेससलाई थप एक खेलमा प्रतिबन्ध लम्ब्याउने निर्णयसँगै उनले अर्जेन्टिनाविरुद्धको फाइनल खेल गुमाउने पक्का भएको हो ।

जेससले क्वाटरफाइनलमा चिलीका इयुजिनियो मेनाको अनुहारमा फ्लाइङ किक प्रहार गरेपछि रातो रेफ्रीले कार्ड देखाउँदै मैदान बाहिर पठाएपछि उनले पेरुविरुद्धको सेमिफाइनल खेल गुमाएका थिए । कन्मेवलको यो निर्णयको ब्राजिलका अर्का स्टार फरवार्ड नेयमारले विरोध गरेका छन् ।

नेयमारले आफ्नो इस्टाग्राममा लेखेका छन्, ‘यस्तो खाले निर्णय गर्ने व्यक्तिको अन्तर्गतमा रहनु निकै दुग्भार्यपूर्ण छ ।’ उनले व्यंग्य पनि गरेका छन् । ‘उनीहरुले खेलको राम्रो विश्लेषण गरे । हामीले धन्यवाद दिनैपर्छ,’ नेयमारले लेखेका छन् ।

उनले आफुबाट गल्तीवस किक प्रहार भएको भन्दै माफी मागिसकेका छन् । आफुलाई दुई खेलको प्रतिबन्ध लगाएर अपिल गर्ने मौका समेत नदिइएपछि जिसुसले पनि व्यंग्य गर्दै दक्षिण अमेरिकी फुटबल संघलाई धन्यवाद दिएका छन् । उनको स्थानमा अब एभर्टनले मौका पाउने सम्भावना छ । एभर्टनले सेमिफाइनलमा पनि पेरुविरुद्ध खेलेका थिए । ब्राजिल र अर्जेन्टिनाबीचको खेल ११ जुलाईमा माराकाना स्टेडियममा हुनेछ ।

साविक विजेता ब्राजिल लगातार उपाधि जित्ने लक्ष्यमा रहँदा अर्जेन्टिना १९९३ पछि पहिलोपटक उपाधि जित्ने लक्ष्यमा हुनेछ । यो खेललाई नेयमार र लियोनेल मेस्सीबीचको भिडन्तको रुपमा समेत हेरिएको छ ।