काठमाडौं (हाम्रो खेलकुद) – दशरथ रंगशालामा चैतमा थ्री नेसन्स कप विजेता राष्ट्रिय फुटबल टोलीका सदस्यलाई सरकारले आइतबार पुरस्कृत गर्ने भएको छ । प्रधानमन्त्री निवास बालुवाटारमा खेलाडीहरुलाई प्रधानमन्त्री केपी ओलीले खेलाडीलाई पुरस्कृत गर्ने अखिल नेपाल फुटबल संघ (एन्फा) का एक सदस्यले जानकारी दिए । कार्यक्रम बिहान ११ बजेका लागि तय भएको बताइएको छ ।

बालगोपाल महर्जन मुख्य प्रशिक्षक रहेको नेपाली टोलीले चैत १६ गत बंगलादेशलाई २–१ ले हराउँदै थ्री नेसन्स कप जितेको केहि दिनपछि सरकारले टोलीका खेलाडीलाई जनही ४ लाख रुपैयाँ दिने निर्णय गरेको थियो । प्रतियोगितामा अर्को टोलीका रुपमा कीर्गिस्तानको यू २३ टोलीले भाग लिएको थियो ।

विश्व कप छनोटका ३ खेल दशरथ रंगशालमा चैतका लागि तय भएपनि कोराना महामारीका कारण नेपालबाट कुवेत सारिएपछि अखिल नेपाल फुटबल संघ (एन्फा) ले थ्री नेसन्स कप आयोजना गरेको थियो । प्रधानमन्त्री केपी शर्मा ओलीले दशरथ रंगशाला पुगेर फाइनल हेरेका थिए । समापनका क्रममा खेलाडीहरुले ‘केपी बा वि लभ यु’ भन्दै नारा लगाएका थिए ।

थ्री नेसन्सको केहि समयपछि आयोजना भएको ट्राइ नेसन्स टि ट्वान्टी सिरिजको विजेता नेपाली क्रिकेट टोलीलाई भने अहिले सम्म सरकारले पुरस्कारको घोषणा गरेको छैन ।

थ्री नेसन्स कप विजेता टोली :

गोलरक्षक – किरण कुमार लिम्बु (कप्तान), विकेश कुथु र दिप कार्की

डिफेन्डर – रन्जित धिमाल, निशान खड्का, रोहित चन्द, अनन्त तामाङ, दिनेश राजवंशी, अजित भण्डारी, विराज  महर्जन र छिरिङ गुरुङ

मिडफिल्डर – त्रिदेव गुरुङ, सुजल श्रेष्ठ, तेज तामाङ, एरिक बिष्ट, सन्जोक राई, विशाल राई, सुनिल बल, रवि शंकर पासवान

फरवार्ड – अन्जन बिष्ट, दर्शन गुरुङ, अभिषेक रिजाल र भरत खवास