काठमाडौं (हाम्रो खेलकुद) – जापानमा भएको नेपाली समूदायबीचको सेभन ए साइड फुटबल रनिङ कपको उपाधि सिजुओका गाईजले जितेको छ । जापानको हिगासिकोसामा शनिबार भएको प्रतियोगितामा एनएन एफसी नागोयालाई टाइब्रेकरमा ३–२ ले हराउँदै सिजुओकाले उपाधि जितेको हो ।

विजेता टोलीले उपाधिसहित २ लाख ५२ हजार ५ सय २५ तथा दोस्रो टोलीले १ लाख ५१ हजार ५ सय १५ जापानी यान प्राप्त गरे । एनएन एफसीका अनिल गुरुङ प्रतियोगिताका उत्कृष्ट खेलाडी चुनिए । विजेता टोलीका सञ्जय प्रधान प्रतियोगिताको सर्वाधिक गोलकर्ता बने भने सोही टोलीका विवेक थापा उत्कृष्ट गोलकिपर चुनिए । एनएन एफसीका प्रेम गुरुङ फाइनलको म्यान अफ दी म्याच घोषित भए । विजेता उपविजेता टोलीका खेलाडीलाई दीपक कार्कीले पुरस्कृत गरे ।

एफसी धरानले आयोजना गरेको प्रतियोगितामा १६ टोलीको सहभागिता थियो । प्रतियोगिता नकआउटका आधारमा भएको थियो । सोही दिन ३५ वर्ष माथिको मैत्रीपूर्ण फुटबलमा एनआरएनए नागोया भेट्रानले नेपारूया भेट्रानलाई ३–२ ले हराएको थियो ।

प्रतियोगितालाई सफल पार्न सहयोग गर्ने संघ, संस्था र व्यक्तिलाई आयोजक एफसी धरानका अध्यक्ष योमन देवानले धन्यवाद दिए । हरेक दुई वर्षमा प्रतियोगिता आयोजना गर्ने लक्ष्य रहेको आयोजक क्लबका उपाध्यक्ष तथा प्रतियोगिता संयोजक सविन राईले जानकारी दिए ।

त्यसअघि देवकुमार घिमिरेले गरेको प्रतियोगिताको उद्घाटन सत्रमा पारस मणि पोखरेल, आदित्य सिं, विधान राई, अर्जुन केसी, कविकिरण न्यौपाने, विमल अधिकारि, राम थापा, मनोज वम मल्ल, यम खत्री, प्रेम राई, श्याम सितल, सन्तोष भूजेल, दीपक घिमिरे, रूपेश मगर, राजकुमार अधिकारी, राम कुमार थापा, विकास आले, बाबुराम खरेल, सुशिल पौडेल, विष्णु कार्की, विष्णुप्रसाद घिमिरे, कुशल पौडेल, कुशल धिताल, कृष्ण गौतम, रामु थापा लगायतको उपस्थिति थियो ।