एजेन्सी – मिडफिल्डर मार्क उथको दुई गोल गरेपछि प्रि–सिजनको पहिलो मैत्रीपूर्ण खेलमा जर्मन बुन्डेसलिगा च्याम्पियन बायर्न म्युनिख पराजित भएको छ ।

एमएस टेक्नोलोजी एरिनामा शनिबार राति भएको खेलमा एक गोलको अग्रता जोगाउन नसक्दा च्याम्पियन बायर्न बुन्डेसलिगा प्रतिद्वन्दी एफसी कोल्नसँग ३–२ ले पराजित भएको हो । खेलको छैटौं मिनेटमा अर्मिन्डो सिएबले गोल गर्दै बायर्नलाई अग्रता दिलाएका थिए । २०औं मिनेटमा जान थिलमानले गोल गर्दै कोल्नलाई १–१ गोलको बराबरीमा ल्याए ।

२७औं मिनेटमा मार्क उथले गोल गर्दै कोल्नलाई २–१ को अग्रता दिलाए । ३५औं मिनेटमा जोशुवा जिर्कजीले गोल गर्दै बायर्नलाई २–२ गोलको बराबरीमा फर्काए । ५६औं मिनेटमा मार्कले व्यक्तिगत दोस्रो गोल गर्दै कोल्नलाई ३–२ को रोमाञ्चक जित दिलाए ।

यो हारसँगै नयाँ प्रशिक्षक जुलियन नागेल्समानले आफ्नो प्रशिक्षणमा पहिलो खेलमा जित दिलाउन सकेनन् । उनी हान्सी फ्लिकले क्लब छाडेपछि बायर्नको प्रशिक्षक बनेका थिए । कोल्नविरुद्ध बायर्नले अधिकांश नयाँ खेलाडीलाई मौका दिएको थियो । युरोपेली च्याम्पियनसिप र कोपापछि पहिलो रोजाईका खेलाडीहरु छुट्टीमा रहेका छन् ।

अब बायर्नले प्रि सिजनमा आयाक्स, बोरुसिया मोन्चेनग्लाडवाक र नेपोलीसँग मैत्रीपुर्ण खेल खेल्ने तालिका छ । त्यसपछि बायर्नले ब्रेमेर एसभीसँग डिएफबी पोकल खेल्नेछ । बोरुसिया मोन्चेनग्लाडवाकसँग १४ अगस्टमा खेल्दै बुन्डेसलिगाको नयाँ सिजन सुरुवात गर्नेछ ।

यता, कोल्नले १५ अगस्टमा हर्था बर्लिनसँग खेल्दै बुन्डेसलिगाको नयाँ सिजन सुरुवात गर्नेछ । त्यसअघि कोल्नले पनि तीन खेल खेल्ने तालिका छ ।