एजेन्सी – भेट्रान डिफेन्डर तथा कप्तान सर्जियो रामोसले स्पेनिस क्लब रियल म्याड्रिड छाडेपछि उनले रियलमा लगाइरहेको ४ नम्बर जर्सी अहिलेसम्म कसैलाई प्रदान गरिएको छैन ।

क्लबले नयाँ खेलाडीको रुपमा अष्ट्रियन अलराउन्डर डेविड अलाबालाई जर्मन क्लब बायर्न म्युनिखबाट अनुबन्ध गरेको छ । त्यसबाहेक रियलले पुरानै खेलाडीलाई निरन्तरता दिइरहेको छ । अब रियलमा रामोसले विरासत बनाएको ४ नम्बर जर्सी कसले लगाउने भन्ने कौतुहलताको विषय बनेको छ ।

हालसम्म कुनै पनि खेलाडीले रियलले ४ नम्बर जर्सी प्रदान गरेको छैन । खेलाडीले पनि ४ नम्बरको जर्सीमा दावी गरेको छैन । खेलाडीहरू आफूलाई मनपर्ने जर्सी लगाउन चाहन्छन् । क्लब भित्र जर्सी नम्बरको कुरामा टिम सहयात्रीहरुबीच विवाद भएको धेरै घटनाहरू बाहिर आइरहेका छन् । रियलमा यो ४ नम्बर जर्सी डेविड अलाबा अथवा क्यासमिरोले लगाउने सम्भावना छ ।

रियलका स्टार सेन्टरब्याक रामोसले क्लबसँग नयाँ सम्झौता गरेनन् । दुईपक्षबीच सम्झौता विस्तारको लागि धेरै छलफल भएपनि सहमतिमा पुग्न नसक्दा उनी फ्रि एजेन्टको रुपमा फ्रान्सेली क्लब पीएसजीमा २ वर्षको लागि अनुबन्धित भए । उनले पीएसजीमा आफ्नो ४ नम्बर जर्सी नै रोजे ।

रियलमा १६ वर्ष बिताएका उनी क्लबको एक लेजेण्ड खेलाडीको रुपमा स्थापित छन् । टोलीमा उनको धेरै सम्मान थियो । अहिले उनी क्लबमा रहेपनि टिम भित्र उनको लागि धेरै सम्मान रहेको देखिन्छ । उनले सन् २००५ देखि २०२१ सम्म क्लबमा ४ नम्बरको जर्सीमा खेले ।

रियलको उक्त जर्सीले नै धेरैलाई रामोसको याद गराउने गर्छ । रामोसले क्लब छाडेपछि हाल उक्त जर्सी नम्बर अन्य खेलाडीहरूको लागि उपलब्ध रहेपनि कुनैपनि खेलाडीले पनि सो जर्सी लगाउने बारे कुरा नगरेको जानकारी छ ।