काठमाडौं (हाम्रो खेलकुद) – ए डिभिजन क्लब फ्रेन्ड्स क्लब कुपण्डोलको नयाँ कार्यसमिति चयन भएको छ । कार्यसमितिमा ११ जना हुनुपर्ने भएपनि तत्काललाई दीपक थापाको अध्यक्षतामा सोमबार १० सदस्यीय नयाँ कार्यसमिति चयन भएको हो ।

एक वरिष्ठ उपाध्यक्ष नियुक्त गर्न बाँकी रहेको नवनियुक्त अध्यक्ष दीपक थापाले जानकारी गराए । क्लबका मुख्य संरक्षक नरसिंह व्यञ्जनकारले बुधबार सोमबार पदाधिकारी तथा सदस्यलाई सपथ गराएको क्लबले विज्ञप्तीमार्फत जनाएको छ । क्लबको उपाध्यक्षमा ध्रुवलाल तण्डुकार र अनिल श्रेष्ठ, सचिवमा राजेन्द्रप्रसाद विडारी र कोषाध्यक्षमा राजु केसी छन् । त्यस्तै सदस्यमा कल्पना रोक्का, बेखा श्रेष्ठ, साहिला महर्जन, विक्रम खनाल र सरोज केसी छन् ।

फ्रेन्ड्सले सोमबार ए डिभिजनका अन्य ३ क्लबसँगको सहकार्यगमा अखिल नेपाल फुटबल संघ (एन्फा) ले एकपक्षिय रुपमा असोज ३ गतेबाट लिग सञ्चालन गर्ने घोषणा गरेकोमा असहमति जनाउँदै क्बलहरुको बैठक बोलाउने माग गरेको छ ।

फ्रेन्ड्सका अध्यक्ष थापासहित जावलाखेल युथ क्लबका अध्यक्ष महेन्द्र क्षेत्री, थ्री स्टार क्लबका महासचिव सन्जिव शिल्पकार र ब्रिगेड ब्वाइज क्लबका अध्यक्ष डा. लालकुमार पुनले मंगलबार संयुक्त रुपमा एन्फालाई पत्र बुझाएका छन् । एन्फा अध्यक्षलाई सम्बोधन गरेको पत्र ए डिभिजन क्लबका पदाधिकारी महासचिव इन्द्रमान तुलाधरले बुझाएका थिए ।

एन्फाबाट असार ३१ गते कर्मचारीको इमेबलबाट पठाएको पत्रमा २०७८ साउन १० गते भित्र टिम दर्ताका लागि पत्र पठाइएकोमा हामी ४ वटा क्लबहरुको असहमति रहेको जानकारी गराउन चाहन्छौं । असार १४ गते एन्फा र ए डिभिजन क्लबहरुको संयुक्त बैठकमा लिग प्रतियोगिताको मार्केटिङका लागि मात्र मिति तय गरौं भन्ने अध्यक्ष ज्यूको विशेष अनुरोध अनुसार हाललाई लिग असार ३ गतेका लागि तय गरि अन्य विषयमा छलफल गर्न छिट्टै सम्पूर्ण क्लबहरुसँग बस्ने निर्णय भएको थियो, पत्रमा भनिएको छ,‘ उक्त सहमति अनुसार नभई एन्फाबाट टिम दर्ता सम्बन्धि एकपक्षिण रुपमा पत्र पठाएको कुरामा असहमति जनाउँदै ए डिभिजन क्लबहरुको यथाशीघ्र बैठक बोलाउन हार्दिक अनुरोध गर्दछ ।

कोभिडको भयावह स्थितिमा पनि ए डिभिजन लिग आयोजनक गर्न कुनै पनि हालमा उपयुक्त नभएको ठहर गर्दै ४ क्लबले संक्रमण दरमा अत्याधिक कमि आइसकेपछि मात्र लिगलगायत फुटबल गतिविधि गर्न उपयुक्त हुने सुझाव दिएका छन् । साथै उनीहरुले एन्फा अध्यक्ष, पदाधिकारी, सदस्यलाई यो विषयलाई गम्भिरतापूर्वक लिन आग्रह समेत गरेका छन् ।

केहि ए डिभिजन क्लबले भने खेलाडी आबद्ध गर्नेदेखि लिगलाई लक्षित गर्दै तयारी सुरु गरिसकेका छन् । ४ क्लबको यो सहमति पछि अब ए डिभिजन लिग तोकिएको मितिमा हुनेमा शंका बढेको छ । २०७६ मा पछिल्लो पटक आयोजना भएको ए डिभिजन लिग मछिन्द्र क्लबले जितेको थियो ।