काठमाडौं (हाम्रो खेलकुद) – अखिल नेपाल फुटबल संघ (एन्फा) कार्यसमितिको बैठक छिट्टै बोलाउने विषयमा एन्फा पदाधिकारीबीच सहमति भएको छ ।

एन्फा अध्यक्ष कर्मा छिरिङ शेर्पा, महासचिव इन्द्रमान तुलाधर र प्रवक्ता किरण राईसहित बैठक माग गर्ने पदाधिकारी र सदस्यबीच मंगलबार भएको छलफल पछि छिट्टै बैठक डाक्ने सहमति भएको एन्फा वरिष्ठ उपाध्यक्ष पंकज विक्रम नेम्बाङले जानकारी दिए । नेम्बाङसहित, उपाध्यक्ष कृष्णबहादुर थापा, उपाध्यक्ष वीरबहादुर खड्का र सदस्य दावा लामाले आइतबार अध्यक्ष शेर्पासँग बैठक माग गर्दै महासचिव तुलाधरलाई पत्र बुझाएका थिए ।

‘अध्यक्ष ज्यू , महासचिव , प्रवक्ता र हामी बैठक माग गर्नेबीच आज छलफल भयो,’वरिष्ठ उपाध्यक्ष नेम्बाङले भने,’सचिवालयले सबै तयारी पूरा गरेर छिटो भन्दा छिटो केन्द्रिय समितिको बैठक राख्नेमा अध्यक्ष ज्यू सहमत हुनुभएको छ।’ एन्फाले साफको उमेर समूह र थ्री नेसन्स कपको विजेता टोलीलाई दिने नगद पुरस्कारका विषयमा पनि छलफल भएको थियो । पुरस्कार राशीमध्ये ५० प्रतिशत पुरस्कार तुरुन्दै दिने गरि प्रक्रिया अघि बढाउने विषयमा पनि सहमति भएको नेम्बाङले जानकारी दिए ।

पदाधिकारीहरुबीच असोज ३ गते देखिका लागि तय भएको सहिद स्मारक ए डिभिजन लिग सञ्चालनका विषयमा ४ वटा क्लबले राखेको असहमतिका विषयमा पनि छलफल भएको बताइएको छ । ‘ए डिजिभन लिग र राष्ट्रिय लिगका विषयमा क्लबहरुको पत्र आएका छन्,’ उनले भने, ‘ती विषयमा छलफल गर्नका लागि पनि सहभागी क्लबहरुको बैठक डाकेर उठेका विषयलाई टुंगो लगाउने सहमति भएको छ ।’

जावलाखेल युथ क्लब, फ्रेन्ड्स क्लब, थ्री स्टार क्लब र ब्रिगेड ब्वाइज क्लबले मंगलबार संयुक्तरुपमा एन्फा अध्यक्षलाई पत्र लेख्दै एन्फाले असोज ३ गतेबाट सुरु हुने लिगमा आफूहरुको असहमति रहेको भन्दै छिट्टै क्लबहरुको बैठक डाक्न माग गरेको थियो ।