एजेन्सी – डच डिफेन्डर भर्जिल भान डाइकले चोटबाट पूनरागमन गरेको खेलमा इंग्लिस क्लब लिभरपुल प्रि–सिजनको तयारी अन्तर्गतको मैत्रीपूर्ण खेलमा पराजित भएको छ ।

अष्ट्रियामा बिहीबार राति भएको खेलमा लिभरपुल जर्मन क्लब हर्था बर्लिनसँग ४–३ ले पराजित भएको हो । हर्थाको जितमा स्टेभन जोभिटिचले दुई तथा सान्टियागो एस्कासिवार र सुआट सेरदारले समान एक गोल गरे । लिभरपुलका साडियो माने, ताकुमी मिनामिनो र एलेक्स च्याम्बरलिनले गोल गरेपनि हार टार्न सकेन ।

६९औं मिनेटमा नाथानिल फिलिप्सको स्थानमा मैदान प्रवेश गर्दै डिफेन्डर भर्जिल भान डाइक मैदान फर्किएका छन् । चोटको कारण डाइक २ सय ८५ दिनपछि मैदान फर्किएका हुन् । उनले युरोकप फुटबल समेत गुमाएका थिए । भान डाइकले गत अक्टोबरमा चोट बोकेका थिए । उनको घुँडाको लिगामेन्टको चोटको शल्यक्रिया गरेका थिए ।

गोलको वर्षा भएको खेलको २१औं मिनेटमा सान्टियागोको गोलबाट हर्था बर्लिनले अग्रता लिएको थियो । ३१औं मिनेटमा सेरदारले गोल गर्दै हर्थाको अग्रता दोब्बर पारे । साडियो मानेले ३६औं मिनेटमा तथा ताकुमी मिनामिनाले ४२औं मिनेटमा गोल गर्दै खेललाई २–२ गोलको बराबरीमा ल्याए ।

६६औं मिनेटमा स्टेभन जोभेटिकले गोल गर्दै हर्थालाई ३–२ ले अघि बढाए । ८०औं मिनेटमा स्टेभन जोभेटिकले व्यक्तिगत दोस्रो तथा टोलीका लागि चौथो गोल गर्दै हर्थालाई जिततर्फ अघि बढाए । ८८औं मिनेटमा एलेक्स अक्सलेड चेम्वरलेनले गोल गर्दै खेललाई ४–३ को अवस्थामा ल्याएपनि त्यसपछि थप गोल निस्कन नसक्दा लिभरपुलले हार बेहोर्न पुग्यो ।

अब लिभरपुलले स्पेनिस क्लब एथलेटिको बिल्वाओ र ओसासुना मैत्रीपुर्ण खेल खेल्ने तालिका छ । त्यसपछि नर्विचसँग खेल्दै लिभरपुलले प्रिमियर लिगको सुरुवात गर्नेछ । हर्थाले मेप्पेनसँग डिएफवी पोकलको खेलपछि कोल्नसँग खेल्दै जर्मन बुन्डेसलिगाको सुरुवात गर्नेछ ।