एजेन्सी – चिर परिचित प्रतिद्वन्द्वी मेक्सिकोलाई फाइनलमा पराजित गर्दै अमेरिकाले कन्काकाफ गोल्ड कपको उपाधि जितेको छ । टाइब्रेकरतर्फ अग्रसर खेलको अतिरिक्त समय सकिन ३ मिनेट समय बाँकी रहँदा माइल्स रबिन्सनले खेलको एकमात्र गोल गरेका थिए ।

निकै प्रतिस्पर्धात्मक खेलमा दुवै टोलीले अवसर सदुपयोग गर्न नसक्दा गोलको लागि अन्तिम समयसम्म कुर्न्नुपरेको थियो । सेट पिसमा केलिन अकोस्टाले दिएको बललाई रबिन्सनले गोलमा परिणत गरेका थिए । अमेरिकाले १-० को जितसँगै सातौं पटक गोल्ड कप उपाधि जितेको हो ।

मेक्सिकोले बलियो टोली उतारेपनि जित दर्ता गर्न भने असफल रहयो । अमेरिकाले यसअघि भएको नेसन्स लिगबाट मात्र एक खेलाडीलाई गोल्डकपमा सहभागी गराएको थियो । युरोपमा खेल्ने अधिकांश खेलाडी क्लबमा गएपछि अमेरिकी टोली केहि कमजोर आँकिएको थियो । तर अमेरिकाले त्यसका बाबजुद एक महिनाको अन्तरमा दोस्रो उपाधि जित्न सफल रहयो ।

सन् २००१७ यता पहिलो पटक उपाधि जितेको अमेरिकाले मेक्सिकोलाई नवौं उपाधिबाट बन्चित गर्यो । क्यानाडाले सन् २००० मा जित्नबाहेक यी दुई राष्ट्रले नै उपाधि जित्दै आएका छन् ।

मेक्सिकोको हेक्टर हेरेरा गोल्डकपको सर्वाेत्कृष्ट खेलाडी चुनिए । क्यानडाका ताजनान बुस्चान गोल्डकपको उत्कृष्ट युवा खेलाडी चुनिदा कतारका अल्मोइज अली सर्वाधिक गोलकर्ता चुनिए । उनले गोल्डकप भर ४ गोल गरेका थिए । अमेरिकाका माट टर्नर उत्कृष्ट गोलरक्षक घोषित भए । अमेरिकाले नै फेयर प्ले अवार्ड जित्न सफल भयो ।

३ जुलाईदेखि भएको उत्तरी अमेरिका, मध्य अमेरिुका र क्यारिबिया क्षेत्रको सबैभन्दा ठुलो गोल्डकपमा १६ राष्ट्रको सहभागिता रहेको थियो । हरेक दुई वर्षमा हुने गोल्डकपमा यस क्षेत्र बाहेका राष्ट्रलाई आमन्त्रण गर्ने गरिन्छ । अमेरिकाले सेमिफाइनलमा कतारलाई तथा मेक्सिकोले क्यानडालाई हराउँदै फाइनलको यात्रा तय गरेको थियो ।