एजेन्सी – इटालियन क्लब युभेन्ट्सका कप्तान जर्जियो किएलिनीले क्लबसँगको सम्झौता नवीकरण गरेका छन् । डिफेन्डर किएलिनीले क्लबसँग दुई वर्षको लागि सम्झौता नवीकरण गरेका हुन् ।
सम्झौता नविकरणसँगै अब ३६ वर्षीय इटालियन डिफेन्डर सन् २०२३ सम्म युभेन्ट्समा रहने छन् । इटालीका कप्तान समेत रहेका किएलिनी सन् २००४ मा रोमाबाट युभेन्ट्स आएका थिए । त्यसयता उनले लिभोर्नाे र फियोरेन्टिनामा एक–एक सिजन लोनमा खेलेका थिए ।
२००५ पछि उनी युभेन्ट्सका मुख्य खेलाडीको रुपमा रहेका छन् । किएलिनीले युभेन्ट्समा १६ सिजन बिताउँदा ६४५ खेलमा ४३ गोल गरेका छन् । किएलिनीले युभेन्ट्सका लागि ९ सिरी ‘ए’, एक सिरी ‘बी’, पाँच कोपा इटालिया र पाँच सुपर कोपा जितेका छन् ।
किएलिनीकै कप्तानीमा इटालीले गत जुलाईमा सम्पन्न युरोपेली च्याम्पियनसिप २०२० को उपाधि जितेको थियो । किएलिनीले इटालीका लागि १ सय १२ खेलम ८ गोल गरेका छन् ।
