काठमाडौं (हाम्रो खेलकुद)– फुटबलको पछिल्लो विवादका विषयमा छानबिन गर्न राष्ट्रिय खेलकुद परिषद् (राखेप) ले मंगलबार सदस्य पुरेन्द्रविक्रम लाखेको संयोजकत्वमा ७ सदस्यीय समिति गठन गरेको छ ।

एन्फाका वरिष्ठ उपाध्यक्ष पंकजविक्रम नेम्बाङ, राष्ट्रिय फुटबल टोलीका प्रशिक्षक अब्दुल्ला अलमुताइरी र दुई सञ्चारकर्मीको विवादका विषयमा छानबिन गर्न एन्फाले युवा तथा खेलकुद मन्त्रालयलाई अनुरोध गरेको थियो । मन्त्रालयले सो जिम्मेवारी राखेपलाई दिएपछि राखेपका कार्यवहाक सदस्य सचिव एकेन्द्र कुवँरले सदस्य लाखेको संयोजकत्वमा समिति गठन गरेको हो ।

छानबिनका लागि मन्त्रालयबाट सोमबार नै पत्र प्राप्त भएकोले प्रक्रिया अघि बढाइएको कार्यवाह सदस्य सचिव कुवँरले बताए । समितिमा राखेप सदस्य सुवर्ण श्रेष्ठ, चन्द्रबन्दना राई, रेनुका श्रेष्ठ, राखेप प्रशिक्षण विभाग प्रमुख अर्जुन बिक, कानुन शाखाका नारायण अर्याल र संघ संस्थाका सरोज पोखरेल रहेका छन् । समितिलाई छानबिनका लागि ७ दिनको समय तोकिएको छ ।

अलमुताइरी र दुई सञ्चारकर्मीसँगको विवादबाट अहिले एन्फामा उग्र रुप लिएको छ । अलमुताइरीले वरिष्ठ उपाध्यक्ष नेम्बाङका कारण आफूलाई काम गर्न अप्ठेरो भएको आशयाका साथ पदबाट राजीनामा दिने घोषणा फेसबुकमार्फत गरेका थिए । सञ्चारकर्मीसँगको घटनामा नेम्बाङको संलग्नता रहेको दाबी अलमुताइरीले गर्दै आएाक छन् । त्यसमा नेम्बाङले कडा आपत्ती जनाउँदै अलमुताइरीविरुद्ध छानबिनको माग राखेका थिए । अलमुताइरीले पनि नेम्बाङ र दुई सञ्चारकर्मीविरुद्ध छानबिनको माग गरेका थिए ।

त्यति विषयमा छलफल गर्न बसेकेको शुक्रबार बसकेको एन्फा केन्द्रिय समितिको आपतकालिन बैठकले मन्त्रालयलाई छानबिनका लागि अनुरोध गर्ने निर्णय गरेको थियो । एन्फाले अर्को निर्णय नभएसम्मका लागि अलमुताइरीलाई राष्ट्रिय टोलीको प्रशिक्षणबाट रोक लगाएको छ । साफ च्याम्पियनसिपको तयारीमा रहेको टोलीलाई एन्फाले १० दिनका लागि विश्राम दिएको छ । मन्त्रालयलाई छानबिन गर्न दिने नहुने तर्क गर्दै एन्फा सदस्य किरण राईले सोमबार प्रवक्ताबाट राजीनामा दिएका थिए ।