एजेन्सी – युरोपेली च्याम्पियन चेल्सीले इटालियन च्याम्पियन इन्टर मिलानबाट आफ्नो पूर्व फरवार्ड रोमेलु लुकाकुलाई फिर्ता बोलाउने प्रयास गर्ने भएको छ । ७ वर्षअघि चेल्सी छाडेका फरवार्डलाई अनुबन्ध गर्न चेल्सीले प्रक्रिया थालेको छ ।

बेल्जियन फरवार्डले पछिल्लो समय उच्च लयमा खेल्दै आएका छन् । सन् २०११ मा चेल्सीमा अनुबन्धित भएका फरवार्डले सिनियर टोलीमा अवसर नपाएपछि क्लब छाडेका थिए । २८ वर्षीय फरवार्डले युरोमा पनि बेल्जियमका लागि प्रभावशाली प्रदर्शन गरेपछि चेल्सीले उनलाई अनुबन्ध गर्ने मुख्य लक्ष्य बनाएको छ ।

चेल्सीले गत साता उनलाई अनुबन्ध गर्न ८५ मिलियन पाउण्डको प्रस्ताव राखेको थियो । इन्टरले भने कुनै हालतमा फरवार्डलाई जान नदिने अडान राखेको छ । लुकाकुले यसअघि आफू इन्टरमा नै खुसी रहेको बताएपनि चेल्सीले आकर्षक रकमको प्रस्ताव राखे ट्रान्सफरको सम्भावना रहेको बुझिएको छ ।

इन्टर आर्थिक रुपमा संघर्ष गरिरहेका कारण सम्भावना जीवित रहेको हो । पहिलो प्रस्तावमा असफल भएपछि चेल्सीले अन्य खेलाडीसमेत समेटेर प्रस्तावको तयारी गर्दैछ । इन्टरको नजरमा रहेका डिफेन्डर मार्कोस अलोन्सोलाई ट्रान्सफरमा समावेश गर्ने सम्भावना रहेको छ ।

यसअघि सन् २०१४ मा चेल्सीले लुकाकुलाई १५ खेलमा मात्र अवसर दिएपछि एभर्टनलाई बेचेको थियो । उनी सन् २०१७ मा ७५ मिलियन पाउण्डमा म्यानचेस्टर युनाइटेड पुगे । युनाइटेडमा २ सिजन बिताएपछि उनी इटाली पुगेका थिए ।