एजेन्सी – पेरिस सेन्ट जर्मेनका अर्जेन्टिनी फरवार्ड लिओनेल मेस्सीले आफू च्याम्पियन्स लिग जित्ने लक्ष्य बोकेर फ्रान्सेली क्लबमा आबद्ध भएको बताएका छन् । मंगलबार ट्रान्सफर प्रक्रिया सकिएपछि बुधबार आयोजित पत्रकार सम्मेलनमा मेस्सी र क्लबका अध्यक्ष नासेर अल खलिफाले आफ्नो अभिव्यक्ति दिएका थिए । उनीहरुले पत्रकारबाट प्रश्नको उत्तर पनि फर्काएका थिए ।

अध्यक्ष खलिफाले मेस्सीलाई पिएसजीसंग आबद्ध भएकोमा धन्यवाद व्यक्त गरे । उनले क्लबले दशकअघि एक लक्ष्य बनाएर सुरु गरेको यात्राले अपेक्षित सफलता हासिल गरेको र मेस्सीको आगमनले अब क्लब अझ अघि बढ्ने बताए । उनले क्लबमा खेलकुद निर्देशक लिओनार्डोलाई विशेष धन्यवाद दिँदै समर्थकहरुलाई थप खुसीको खबर दिन तत्पर रहेको बताए ।

मेस्सीले भने पिएसजी रोज्नु आफ्नो लागि निकै कठिन निर्णय भएको बताए । उनले क्लबलाई धन्यवाद दिँदै पेरिस आएपछि निकै उत्साह थपिएको बताए । मेस्सीले समर्थकबाट पाएको साथबाट आश्चर्यमा पारेक जनाउँदै आफू प्रशिक्षणमा उत्रन आतुर रहेको अभिव्यक्ति दिए । उनले पिएसजी सधैं उपाधिका लागि प्रतिस्पर्धा गर्ने टोली रहेको र एकसाथ सबै लक्ष्य हासिल गर्न अघि बढ्ने बताए ।

मेस्सीले बार्सिलोनासँग भएको घटनालाई अनपेक्षित रहेको बताउँदै त्यसबाट अघि बढ्नु समयको माग रहेको बताए । ‘ गत साता मलाई जे भयो, निकै कठिन थियो । भावनात्मक रुपमा पनि मलाई निकै गाह्रो भयो । अब म र मेरो परिवार नयाँ सुरुवातलाई लिएर उत्साहित छौं । अघिल्लो साता जे भयो, त्यसलाई समयसँगै अघि लग्नुपर्छ ।’

मेस्सीले आफू कहिले डेब्यु गर्ने भन्नेबारे अहिले यकिन भन्न नसकिने बताए । ‘ म भर्खर छुट्टिबाट फर्केको छु । अब केहि समय प्रि-सिजन बिताएर म ठिक अवस्थामा आउन चाहन्छु । प्राविधिक टोलीसँग नजिक रहेर मिहिनेत गर्नेछु ,’ उनले भने ।

मेस्सीले पिएसजीका समर्थकको साथले आफू निकै प्रभावित भएको बताए । ‘म समर्थकहरु प्रति आभारी छु । मैले बार्सिलोनामा रहँदा नै पेरिसमा भिड जम्मा भएको थाहा पाएँ । जब यहाँ आएर समर्थन देखें, विश्वास गर्न सकिन । म सबैलाई धन्यवाद दिन्छु र आशा छ रंगशालामा हेर्न पाउनेछु । हामी सक्दो राम्रो खेलेर सबैलाई खुसी पार्नेछौं,’ उनले थपे ।

मेस्सीले पिएसजी र आफ्नो लक्ष्य च्याम्पियन्स लिग जित्नु रहेकोले पनि धेरै सोच्नु नपरेको बताए । ‘बार्सिलोनामा बस्न नसक्ने पक्का भएपछि मैले भविष्यबारे सोच्नु थियो । पिएसजी र मेरो व्यक्तिगत लक्ष्य च्याम्पियन्स लिग जित्नु हो । म ठूलो क्लबबाट ठूला प्रतियोगिता जित्न चाहन्छु । क्लब र मेरो लक्ष्य मिल्ने भएर नै यहाँ आएको हुँ,’ उनले भने ।

‘बार्सिलोनासँग कहीले खेल हुन्छ थाहा छैन । तर बार्सिलोना फर्कन पाउँदा राम्रो लाग्छ । आशा गरौं खेल भएको खण्डमा समर्थक पनि भएको अवस्था हुनेछ । क्याम्प नोउमा अर्को जर्सी लगाएर खेल्दा कस्तो हुन्छ सोचेको छैन, तर हेर्दै जाउँ,’ उनले भने ।

पिएसजीका अध्यक्ष खलिफाले मेस्सीलाई अनुबन्ध गर्दा क्लबले आर्थिक रुपमा कुनै समस्या नभएको प्रष्ट पारे । ‘हामी आर्थिक रुपमा राम्रो स्थितिमा छौं । हामी सधैं नियममा रहेर नै काम गर्छों । मेस्सीको आगमनपछि जुन किसिमको नतिजा आएको छ, मैले सोचेको थिइनँ । आशा गरौं मेस्सीले यो देखेर आफ्नो तलब बढाउन भन्दैनन्, तर तीन दिनमा हामीले कहिले नसोचेको नतिजा मैदानबाहिर पाएका छौं । अब मैदानभित्र मेस्सीबारे धेरै भन्नु पर्दैन । आशा छ उनले टोलीसँग मिलेर सफलता दिलाउनेछन्,’ उनले थपे ।

यो पनि : पिएसजीमा मेस्सीको नयाँ यात्रा सुरु