एजेन्सी – रियल म्याड्रिडका अध्यक्ष फ्लोरेन्टिनो पेरेजले बार्सिलोनाका पूर्व कप्तान लिओनेल मेस्सीको ट्रान्सफरमा आफ्नो कुनै भूमिका नरहेको प्रष्ट पारेका छन् ।

सामाजिक संजालमा पेरेजले मेस्सीलाई बार्सिलोनाबाट बाहिर पठाउन प्रभाव पारेको भन्दै थुप्रै चर्चा भएको थियो । बार्सा कमिसनका पूर्व सदस्य जाउमे लोपिसले पेरेज यस विषयमा आबद्ध रहेको बताएपछि सामाजिक संजालमा रियल अध्यक्षविरुद्ध बार्सिलोना समर्थक खनिएका थिए । तर पेरेजले बुधबार विज्ञप्तिमार्फत त्यो सत्य नरहेको बताए ।

‘मैले मेस्सीको ट्रान्सफरमा कुनैपनि हिसाबले प्रभाव पार्ने कुरा असम्भव छ । यो सब झुटो आरोप हो । म बार्सिलोनाको सीइओ फेरान रेभर्टरसँग राम्रोसँग साथी पनि भएको छैन,’ उनले भने, ‘मैले अहिलेसम्म उनलाई जम्मा दुई पटक भेटेको छु । पहिलो पटक ४ महिना अघि र दोस्रो पटक मेस्सी बाहिरिने पक्का भएपछि शनिबार भेटेको हो ।’

आरोप लगाउने लोपिसले भने रियल अध्यक्ष पेरेज र बार्सिलोनाका सीइओ रेभर्टर नजिकका साथी रहेको र बार्सिलोनाको निर्णयमा प्रत्यक्ष प्रभाव पारेको बताए । ‘मेस्सीले क्लब छाड्दा रियललाई फाइदा पुग्छ नै । अझ यसले त किलियन एम्बापपेलाई रियल म्याड्रिड आउने बाटो पनि खोलेको छ । रेभर्टरकै कारणले बार्सिलोना अध्यक्ष लापोर्टा मेस्सीलाई राख्न सम्भव नहुने पक्षमा पुगेका थिए,’ उनले भने ।

मेस्सी पिएसजी पुगेसँगै अध्यक्ष नासेर अल खलिफाले भने एमबाप्पे पिएसजीमै रहने प्रष्ट पारेका छन् । ‘एमबाप्पे पिएसजीमै रहन्छन् । उनले यसअघि पनि क्लबको लक्ष्य प्रष्ट हुनुपर्ने बताएका थिए । अहिले हामी विश्वको उत्कृष्ट टोली निर्माण गरेर लक्ष्यमा अघि बढेका छौं । उनले अब बस्नुको विकल्प देख्दिन,’ खलिफाले भने ।