एजेन्सी – स्पेनिस ला लिगाको नयाँ सिजनको पहिलो राउन्डको खेलमा आज विभिन्न चार खेलम प्रतिस्पर्धा हुदाँ साविकको उपविजेता रियल म्याड्रिडले डिपोर्टिभो एलाभेससँग प्रतिस्पर्धा गर्दैछ । खेल एलाभेसको मैदानमा नेपाली समयअनुसार राति १:४५ बजे हुनेछ ।

घरेलु टोली एलाभेस बलियो रियललाई रोक्ने लक्ष्यमा मैदान उत्रनेछ । टोलीसँग लुकास पेरेज, जोसेलु, थोमस पिना, इड्गर मेन्डेज, लुइस रिओजा, पेरे पोन्स, रुवेन डुआर्टे, छिमो नाभारो र गोलरक्षक फर्नान्डो पचेकोको साथ रहेको छ । रियलको नयाँ रक्षापंक्तिलाई दबाबमा राख्दै एलाभेस सुखद सुरुवात गर्न चाहन्छ ।

यता, रियल घरेलु टोलीलाई हराउँदै ला लिगामा सुखद सुरुवात लिने लक्ष्यमा मैदानमा उत्रनेछ । कप्तान सर्जियो रामोस र राफयल भरानले क्लब छाडेपछि उनीहरुको स्थान डेभिड अलाबा र इडर मिलिसाओले सम्हाल्नेछन् । कप्तान मार्सेलोले चोट बोकेका कारण उनको स्थान मिगुइल गुइटेरेजले लिनेछन् । लुकास भास्क्वेज, नाचो फर्नान्डेस र अल्भारो ओर्डिओजोला पनि टोलीमा रहेका छन् ।

मिडफिल्डमा लुका मोड्रिच, क्यासमिरो, फेडे भाल्भेर्डे, इस्को र एन्टेनियो ब्लान्को रहँदा गोलपोस्ट थिवाउट कोर्टुवाले नै सम्हाल्नेछन् । फरवार्डमा केरिम बेन्जेमा, इडेन हाजार्ड, ग्यारेथ बेल, भिनि जुनियर, रोड्रिगो, मार्काे एसेन्सियो र लुका जोभिक रहेका छन् । जिदानको रोजाइमा पर्न नसकेका इस्को र बेलले सुरुवाती रोजाइमा खेल्ने सम्भावना छ ।

चोटका कारण रियलका सदाबहार मिडफिल्डर टोनी क्रुस, फर्लान्ड मेन्डी र ड्यानियल सेवालोस टोलीमा छैनन् । प्रशिक्षक कार्लाे एन्सेलोटीले मार्टिन ओडेगार्डलाई टोलीमा समेटेका छैनन् । उनले गत सिजन लोनमा पुगेको प्रिमियर लिग क्लब आर्सनलसँग अनुबन्ध गर्ने चर्चा छ ।

यि दुई टोलीको पछिल्लो १० भेटमा रियल ८ खेलमा विजयी भएको छ । दुई खेल एलाभेसले आफ्नो पक्षमा पारेको छ । गत सिजनको ला लिगाको दुई खेलमा दुवै टोलीले समान एक खेल जितेका थिए । घरमै एलाभेससँग २–१ ले स्तब्ध हुदा रियल म्याड्रिडले उसकै मैदानमा ४–१ को जित निकालेको थियो ।

अन्य खेल :

क्याडिजविरुद्ध लेभान्टे (राति ११:१५ बजे)

मलोर्काविरुद्ध रियल बेटिस (राति ११:१५ बजे)

ओसासुनाविरुद्ध इस्पान्योल (राति ०१:४५ बजे)