काठमाडौं (हाम्रो खेलकुद) – अखिल नेपाल फुटबल (एन्फा) को खेलकुद सामाग्री प्रायोजक केटिएम सिटीले फुटबल सम्बन्धित सामाग्री मात्र समावेश गरेर एन्फा सोरुम सञ्चालनमा आएको छ । शेर्पा आउटडोरको केटिएम सिटीले दरवारमार्गस्थित केटिएम टावरमा एन्फा सोरुम सञ्चालनमा ल्याएको हो ।

एन्फा सोरुमको अखिल नेपाल फुटबल संघ (एन्फा)का अध्यक्ष कर्माछिरिङ शेर्पा, एन्फाका उपाध्यक्ष तथा युथ डेभलपमेन्ट कमिटिका अध्यक्ष उपेन्द्रमान सिंह र एन्फाका महासचिव इन्द्रमान तुलाधरले आईतबार उद्घाटन गरे । एन्फासँग औपचारिक सहकार्य सुरु गरेको केटीएम सिटीले पहिलोपटक एन्फा सोरुम सञ्चालनमा ल्याएको हो ।

सोरुममा राष्ट्रिय फुटबल टिमको आधिकारिक जर्सी तथा खेलका विभिन्न सामाग्री खरिद गर्न सकिनेछ । यस वर्षदेखि राष्ट्रिय फुटबल टिमलाई शेर्पा आउटडोरको केटिएम सिटीले मुख्य प्रायोजन गरेको छ । पहिलोपटक खुल्ला प्रतिस्पर्धाबाट आह्वान गरिएको टेण्डरमा केटीएमल सिटीले सर्वाधिक रकम प्रस्ताव गर्दै तीन वर्षका लागि राष्ट्रिय फुटबल टिमको जर्सी र खेल सामाग्रीको आधिकारिक प्रायोजक कम्पनी बनेको हो ।

एन्फाका अध्यक्ष कर्मा छिरिङ शेर्पाले एन्फा सोरुममा एन्फाको सबै सामग्री पाइने यसको शाखा देशभर सञ्चालन हुनेमा विश्वस्त रहेको बताए ।
केटीएम सिटीका प्रबन्ध निर्देशक निमा नोर्बु लामाले नेपाली ब्राण्ड राष्ट्रिय फुटबल टिमको मुख्य प्रायोजक बन्न पाउनु गर्वको विषय रहेको विस्तारै शाखाहरु देशभर विस्तार गरिने बताए ।

केटीएम सिटीले राष्ट्रिय फुटबल टिमसँगै ‘ए’ डिभिजन क्लबहरु मनाङ मर्स्याङ्दी क्लब र हिमालयन शेर्पा क्लबसँग प्रायोजन गरेको छ । चाडै नै क्लब सामाग्रीको लागि पनि छुट्टै शोरुम खोल्ने केटिएमको तयारी रहेको छ ।