एजेन्सी – फ्रान्सेली लिग अन्तर्गत शुक्रबार राती हुने खेलमा पेरिस सेन्ट जर्मेन (पिएसजी) ले ब्रेस्टको सामना गर्दैछ । खेल नेपाली समयअनुसार रातको १२:४५ बजे हुनेछ ।

पिएसजीले यसै ट्रान्सफर विन्डोमा फ्रि ट्रान्सफरमा भित्र्याएका अर्जेन्टिनी फरवार्ड लिओनेल मेस्सी भने खेलमा उपस्थित हुने छैनन् । गत साता नै क्लबमा आबद्ध मेस्सीले यसअघि स्ट्रासबर्गविरुद्ध खेल पनि गुमाएका थिए । आजको खेलमा पनि नखेल्ने भएपछि उनको डेब्युको प्रतीक्षा कम्तिमा एक साता लम्बिने भएको छ ।

मेस्सीसँगै ब्राजिलियन स्टार नेयमार र अर्जेन्टिनी डिफेन्डर लिआन्द्रो पारेडेस पनि टोलीमा समावेश छैनन् । दुवै खेलाडीले मेस्सीसँग कोपा अमेरिका फाइनल खेलेका कारण प्रशिक्षक माउरिसियो पोचेटिनोले पूर्ण फिटनेसको लागि ध्यान दिइरहेका छन् ।

युरोका सर्वोत्कृष्ट खेलाडी तथा इटालीका गोलरक्षक जियानलुइजी डोनारुम्मा भने टोलीमा अटाएका छन् । उनले आज पिएसजीका लागि डेब्यु गर्ने सम्भावना छ । स्पेनिस डिफेन्डर सर्जियो रामोस भने चोटका कारण अझै केहि समय बाहिर रहनेछन् ।

पिएसजीले मेस्सीलाई अगस्ट १० मा औपचारिक अनुबन्ध गरेपछि शनिबार लिग अन्तर्गत खेल खेलिसकेको छ । उक्त खेलअघि मेस्सीसँगै टोलीले यसै ट्रान्सफर विन्डोमा अनुबन्ध गरेका ५ खेलाडीलाई सार्वजनिक गरिएको थियो । नयाँ खेलाडीमध्य अक्रफ हाकिमी र जिओर्जिनिओ वाइनाल्डमले खेलिसकेका छन् । सर्जियो रामोस चोटका कारण फिट छैनन् ।

मेस्सी र गोलरक्षक जियानलुइजी डोनारुम्माले भने अन्तर्राष्ट्रिय खेलबाट ढिलो आएका कारण केहि प्रतीक्षा गर्नुपर्ने भएको हो । डोनारुम्माले केहि अघि नै प्रशिक्षण थालेकाले अर्को साता खेल्ने सम्भावना छ । तर मेस्सीको हकमा भने प्रि सिजन प्रशिक्षण पनि नगरेकाले पूर्ण म्याच फिट हुन अझै केहि समय प्रतीक्षा गर्नुपर्ने देखिन्छ ।

पिएसजीले फ्रान्सेली लिगअन्तर्गत आज ब्रेस्टको सामना गर्दैछ । हाल म्याच फिटनेसका लागि प्रशिक्षण गरिरहेका मेस्सीले अगस्ट २९ मा हुने राइम्सविरुद्ध खेलमा सुरुवात गर्न सक्नेछन् । पिएसजीका समर्थकले उनलाई घरेलु मैदानमा हेर्न भने सेप्टेम्बर १२ को क्लेरमन्ट फुटविरुद्ध खेल कुर्नुपर्ने हुन्छ । त्यसअघि मेस्सीले अर्जेन्टिनाबाट विश्वकप छनोट अन्तर्गत तीन खेल खेल्ने सम्भावना छ ।

पिएसजीको खेल तालिका (नेपाली समय अनुसार):

ब्रेस्ट विरुद्ध पिएसजी (अगस्ट २१ शनिबार विहान १२:४५ बजे (शुक्रबार मध्यराती))

राइम्स विरुद्ध पिएसजी (अगस्ट ३० सोमबार विहान १२:३० बजे (आइतबार मध्यरात))

अर्जेन्टिनाको विश्वकप छनोट अन्तर्गत भेनेजुएला, ब्राजिल र बोलिभियाविरुद्ध खेल

पिएसजी विरुद्ध क्लेरमन्ट फुट – सेप्टेम्बर १२