पोखरा (हाम्रो खेलकुद) – साफ च्याम्पियनसिप प्रशिक्षणका क्रममा पोखरामा रहेको राष्ट्रिय फुटबल टोलीलाई खेलकुदका विभिन्न ५ निकायले संयुक्त रुपमा स्वागत गरेका छन् । सोही कार्यक्रममा प्रदेश खेलकुद परिषद् गण्डकीका नवनियुक्त उपाध्यक्ष ध्वजकुमार गरुङलाई बधाई तथा शुभकामना दिइएको थियो ।

राष्ट्रिय खेलकुद परिषद् (राखेप), पश्चिमाञ्चल क्षेत्रीय खेलकुद विकास समिति, प्रदेश खेलकुद परिषद् गण्डकी, कास्की जिल्ला खेलकुद विकास समिति र पोखरा महामनगर खेलकुद विकास समितिले शनिबार संयुक्तरुप पोखरा रंगशालामा कार्यक्रम आयोजना गरेका थिए ।

राखेपका सदस्य राजेश गुरुङ, प्रदेश खेलकुद परिषद् गण्डकीका सदस्य सचिव तेज गुरुङ, जिल्ला फुटबल संघ कास्कीका अध्यक्ष मिलन गुरुङ, क्षेत्रिय खेलकुद विकास समितिका प्रमुख लक्ष्मण योगीलगायतले टोलीलाई स्वागत गरेको थियो ।

दश दिनयता फुटबल टोली पोखरा रंगशालामा प्रशिक्षण गरिरहेको छ । दुई साताका प्रशिक्षणका लागि टोली पोखरा पुगेको थियो । यसै महिना नेपाल र भारतबीच दशरथ रंगशालामा दुई वटा मैत्रीपूर्ण खेल हुँदैछ । पहिलो खेल भदौ १७ र दोस्रो खेल भदौ २० गते हुनेछ ।

साफ च्याम्पियनसिप असोज १५ गतेदेखि २७ गते सम्म माल्दिभ्समा आयोजना हुँदैछ । ५ राष्ट्रको सहभागिता रहने च्याम्पियनसिपमा असोज १५ गते साविक विजेता समेत रहेको माल्दिभ्ससँग खेल्दै नेपालले प्रतियोगिताको सुरुवात गर्नेछ ।

त्यस्तै असोज १७ गते श्रीलंका, असोज २२ गते भारतसँग खेल्ने नेपालले राउन्ड रोविनको अन्तिम खेल असोज २५ गते बंगलादेशसँग खेल्नेछ । शीर्ष २ टोलीले असोज २७ गते फाइनल खेल्नेछन् ।