एजेन्सी – गत सिजनको विजेता इन्टर मिलानले नयाँ सिजनको इटालियन सिरी ‘ए’ मा सानदार विजयी सुरुवात गरेको छ । घरेलु मैदानमा शनिबार राति भएको खेलमा इन्टरले जिनोआमामाथि ४–० को जित निकाल्दै सिरी ‘ए’ मा सानदार सुखद् सुरुवात गरेको हो ।

इन्टरको फराकिलो जितमा मिलान स्क्रिनिएर, हकान चलहानोग्लु, आर्टुरो भिडाल र इडेन जेकोले गोल गरे । पहिलो र दोस्रो हाफमा समान दुई गोल निस्किएको थियो । घरेलु मैदान मिलानोमा इन्टरले खेलको छैटौ मिनेटमा मिलान स्क्रिनिएरको गोलबाट अग्रता लिएको थियो । उनले हकान चलहानोग्लुको पासमा गोल गरेका थिए ।

१४औं मिनेटमा हकान चलहानोग्लुले इडेन जेकोको पासमा गोल गरेपछि इन्टरले पहिलो हाफमा २–० को अग्रता लिन सफल भएको थियो ।७४औं मिनेटमा सब्सिच्युट आर्टुरो भिडालले गोल गर्दै इन्टरलाई फराकिलो जिततर्फ अग्रसर गराए । स्टेफानो सेन्सीको स्थानमा मैदान छिरेको भिडालले मैदान छिरेको ६ मिनेट भित्रै निकोलो बरेल्लाको पासमा गोलगर्न सफल भएका थिए ।

खेल सकिन तीन मिनेट बाँकी रहँदा भिडालको पासमा इडेन जेकोले गोल गर्दै इन्टरलाई ४–० को सानदार जित दिलाए । यो समरमा मुख्य फरवार्ड रोमेलु लुकाकु र डिफेन्डर अचरफ हाकिमीले क्लब छाडेपनि त्यसको असर इन्टरको खेलमा देखिएन । लुकाकु चेल्सी तथा हाकिमी पीएसजी पुगेका छन् ।

सिरी ए कै अर्काे खेलमा सस्सुलोले १० खेलाडीमा समेटिएको हेलास भेरोनालाई ३–२ ले पराजित गरेको छ । सस्सुलोको जितमा जियाकोमो रास्पाडोरी, फिलिप र हामेद ट्राओरेले गोल गरे ।

घरेलु टोलीका माटिया जाकाग्नीले दुवै गोल गरे । एक गोलले पछि रहेको अवस्थामा मिगुइल भेलोसो दोहोरो पहेँलो कार्ड पाएपछि हेलास भेरोना १० खेलाडीमा समेटिन पुगेको थियो ।