एजेन्सी – इटालियन सिरी ‘ए’ को नयाँ सिजनको पहिलो खेलमा लाजियो र एटलान्टाले विजयी सुरुवात गरेका छन् । लाजियोले नव प्रवेशी इम्पोलीमाथि उसकै मैदानमा एक गोलले पछि परेको अवस्थामा ३–१ को पूनरागमन जित दर्ता गरेको हो ।

लाजियोको जितमा सेर्गेज मिलिन्कोभिक साभिक, म्यानुयल लज्जारी र सिरो इम्मोविलेले गोल गरे । घरेलु टोलीका फिलिप्पो वान्डीनेलीको गोल सान्त्वना बन्यो । खेलको चौथो मिनेटमा नै फिलिप्पो वान्डीनेलीको गोलबाट घरेलु टोलीले अग्रता लिएको थियो ।

तर त्यो अग्रता लामो समय टिकेन छैटौं मिनेटमा नै सेर्गेज मिलिन्कोभिक साभिकले बराबरी गोल फर्काए । ३१औं मिनेटमा म्यानुयल लज्जारीले गोल गर्दै लाजियोलाई २–१ ले अघि बढाए ।

४१औं मिनेटमा सिरो इम्मोविलेले पेनाल्टीमार्फत गोल गरेपछि लाजियोले पहिलो हाफमै ३–१ को अग्रता लियो । दोस्रो हाफमा दुवै टोलीबाट गोल निस्कन नसक्दा पहिलो हाफको नतिजा नै लाजियोको जितमा निर्णायक बन्यो ।

अर्काे खेलमा एटलान्टाले टोरिनोमाथि २–१ को जित दर्ता गर्दै सिरी ‘ए’ मा विजयी सुरुवात गरेको छ । एटलान्टाको जितमा लुइस मुरिएल र रोबर्टाे पिकोलीले गोल गरे । घरेलु टोली टोरिनोका एन्ड्रिया बेलोट्टीले एक गोल फर्काए ।

बराबरीतर्फ धकेलिएको खेलको इन्ज्युरी समयको थप गरिएको तेस्रो मिनेटमा रोबर्टाे पिकोलीले गोल गर्दै एटलान्टालाई ३ अंक दिलाएका थिए ।