काठमाडौं (हाम्रो खेलकुद) – लिग च्याम्पियन मच्छिन्द्र फुटबल क्लबले आफ्ना स्टार डिफेन्डर रन्जित धिमालसँगको सम्झौता नविकरण गरेको छ ।

क्लबले मंगलबार आफ्नो सामाजिक संजालमार्फत रन्जितसँग सम्झौता नवीकरण भएको जानकारी गराएको हो । मच्छिन्द्रले रन्जितसँग सन् २०२१–२२ को लागि सम्झौता नविकरण गरेको बताएको छ । सम्झौता रकम भने खुलाइएको छैन । मच्छिन्द्रलाई क्लब इतिहासमै पहिलोपटक लिग च्याम्पियन बनाउन रन्जितको भुमिका महत्त्वपूर्ण भुमिका रहेको थियो ।

क्लबले गत सिजन मच्छिन्द्रबाटै खेलेका सुजल श्रेष्ठ, रेजिन सुब्बा, विशाल श्रेष्ठ, अभिषेक रिजाल लगायतका खेलाडीहरुसँगको सम्झौता पनि नविकरण गरिसकेको छ । सुनिल बल र मनिष डाँगीलाई नयाँ खेलाडीको रुपमा भित्र्याएको छ ।

राष्ट्रिय टोलीको प्रशिक्षण क्याम्पमा रहेका रन्जित गत साता टोलीबाट बाहिरिएका थिए । लामो समय रुस्लान थ्री स्टारमा बिताएका रन्जितले गत जेठमा सम्पन्न नेपाल सुपर लिगमा विराटनगर सिटीको कप्तानी गरेका थिए ।

२०७६ सालमा लिग च्याम्पियन बन्ने मच्छिन्द्रको महत्त्वाकांक्षी योजना बुन्दा रन्जितले थ्री स्टार छाडेका थिए । अखिल नेपाल फुटबल संघ (एन्फा) ले २९ कात्तिकबाट सहिद स्मारक ‘ए’ डिभिजन लिग आयोजना गर्ने योजना बनाएको छ । राष्ट्रिय लिगको मिति भने घोषणा गरिएको छैन ।