काठमाडौं (हाम्रो खेलकुद) –राष्ट्रिय फुटबल टोलीका प्रशिक्षक अब्दुल्लाह अलमुताइरी र अखिल नेपाल फुटबल संघ (एन्फा) का वरिष्ठ उपाध्यक्ष पंकजविक्रम नेम्बाङबीच विवादलाई सुल्झाउन राष्ट्रिय खेलकुद परिषद (राखेप) ले गठन गरको छानविन समितिले बुधबार राखेप सदस्य सचिव रमेशकुमार सिलवाललाई प्रतिवेदन पेश गर्यो । छानविनको बयान लिएको झन्डै २ सातापछि समितिले प्रतिवेदन बुझाएको थियो ।

प्रतिवेदनमा समितिले राखेपमार्फत एन्फालाई ११ बुंदामा विभिन्न निर्देशन दिन सुझाव दिएको छ । तर उक्त प्रतिवेदनको सुझाव सार्वजनिक भएपछि प्रशिक्षक अलमुताइरीले सामाजिक संजालमा असन्तुष्टी पोखेका थिए । अलमुताइरीले ‘म निस्किएँ, राजनीतिले काम गरोस्’ लेख्दै प्रतिवेदनको सुझावप्रति आफ्नो असन्तुष्टी जनाएका हुन् ।

प्रशिक्षक अलमुताइरीले यसअघि एन्फालाई छानविनको माग गर्दै लेखेको निवेदनमा दुई व्यक्तिले आफू संचारकर्मी भएको दावी गर्दै अवान्छनीय ढंगले दु:ख दिएको बताएका थिए । उनले राखेपको छानविन समितिसमक्ष बयान दिने क्रममा पनि सोहि निवेदनमा थप प्रष्ट पार्ने तथा अन्य विभिन्न पक्षमा आफ्नो धारणा राखेका थिए। अलमुताइरीले बयानका क्रममा दिएको पत्र र त्यहाँ दिएको अभिव्यक्तिको सारांश हाम्रो खेलकुदलाई स्रोतबाट प्राप्त भएको छ ।

अलमुताइरीले बयानका क्रममा दिएको विषयवस्तुमा एन्फा प्रशासनबाट आफूलाई सधैं राष्ट्रिय टोलीको प्रशिक्षकको रुपमा साथ र सहयोग रहेको बताएका छन् । उनले फुटबल विकासका लागि प्रशासनको भूमिका महत्त्वपूर्ण रहेको र त्यसमा एन्फाले सधैं विकासको लक्ष्य बोकेर नै अघि बढेको पनि उल्लेख गरेका छन् ।

उनले साउन ७ गते आफूविरुद्ध धुमपान गरेको विषयलाई लिएर भएको घटना व्यक्तिगत रुपमा उनको इज्जतमा आँच पुर्याउन गरिएको कदम रहेको जनाएका छन् । उनले नेपालको कानुनअनुसार एन्फा परिसरबाहिर धुमपान गर्नु गैरकानुनी नरहेको जानकारी आफूले पाएको पनि उल्लेख गरेका छन् । उनले दुई व्यक्तिले आफूलाई संचारकर्मी भएको बताउँदै व्यक्तिगत स्वतन्त्रता हनन गर्दै आक्रमण गरेको समेत बताएका छन् । दुई व्यक्तिले वेबसाइटमा आफूविरुद्ध लेखेको लेखमा पनि उनले आपत्ति जनाएका छन् ।

अलमुताइरीले बयानका क्रममा उक्त घटनापछि भने दुई व्यक्तिले आफूलाई सम्पर्क गर्दै घटनाका विषयमा सहमतिमा आउन प्रयास गरेको पनि बताएका छन् । यसले पनि दुई व्यक्तिले जानाजान आफूविरुद्ध उक्त घटना घटाएको आरोप अलमुताइरीले लगाएका छन् ।

अलमुताइरीले घटनामा संलग्न दुई व्यक्ति र एन्फाका केहि पदाधिकारीबीच सम्बन्ध रहेको दाबी गर्दै लेखेका छन् । यी सबै मिलेर नेपाली फुटबल विकासमा आफ्नो प्रयासमा बाधा ल्याउने र उनको इज्जत गिराउने प्रयास गरेको अलमुताइरीको बुझाइ छ । उनले सोहि मिडियाले एन्फा वरिष्ठ उपाध्यक्षको अन्तर्वाता लिनु र त्यसै मिडियाले मात्र पूर्व प्रवक्तालाई उदृत गर्दै अलमुताइरीलाई प्रतिबन्ध गरिएको समाचार लेख्नुले शंका गर्ने ठाउँ रहेको बताए ।

अलमुताइरीले आफूलाई राष्ट्रिय टोलीको प्रशिक्षकको रुपमा काम गर्न सुरक्षा महसुस नगरेको पनि जनाएका छन् । उनले नेपाली फुटबलले आफूसंग आशा राखीरहँदा र आफूले काम गर्ने सुरक्षित वातावरण नपाउँदा नतिजा दिन कसरी सकिन्छ भन्ने प्रश्न पनि गरेका छन् । उनले आफूले कहिले पनि एन्फाको राजनीति वा शक्ति संघर्षमा आफ्नो भूमिका नरहेको स्पष्ट पार्ने प्रयास गरेका छन् । अलमुताइरीले आफूविरुद्ध राजनीतिक रुपमा जोडिएको भन्ने आरोप यस घटनालाई मोड्नका लागि प्रयोग गरिएको बताएका छन् ।

उनले दुई व्यक्तिले आफूलाई संचारकर्मी बताइरहँदा नेपालको प्रेस काउन्सिलमा दावी गरिएको कुनै संचार माध्यम दर्ता नभएकोले ती व्यक्तिको कदम नै गैरकानुनी रहेको भन्दै प्रतिप्रश्न गरेका छन् । अलमुताइरीले त्यसै वेबसाइटमा लेखिएको फरक फरक लेखमा उक्त दिनको घटनालाई फरक रुपमा प्रस्तुत गर्नुले पनि ती व्यक्तिको बदनियत प्रष्ट रहेको बताएका छन् । उनले आफ्नो इज्जतमा आँच पुर्याउन नै घटनालाई मोडिएको भन्दै दुई उदाहरण समेत प्रस्तुत गरेका छन् ।

अलमुताइरीले वेबसाइटमा जनाएअनुसार दुई व्यक्ति भ्रष्टाचार सम्बन्धि रिपोर्ट बनाउन आएकोमा एक्कासी प्रशिक्षक बाहिर धुमपान गरेको खिच्न आउनुमा उनलाई फसाउने नियत रहेको पनि लेखेका छन् । उनले आफू एन्फा परिसर बाहिर आएको आफैं कानुनी रुपमा गलत नहुँदा पनि फसाउन विभिन्न बहाना बनाइएको लेखेका छन् ।

यसबाहेक अलमुताइरीले घटना भएको दिन आफू प्रशिक्षकको भूमिकामा नरहेको पनि बताएका छन् । उनले त्यस दिन मैत्रीपूर्ण खेलमा टोलीका दुई खेलाडीलाई प्रशिक्षक बनाएर आफू बाहिर रहेको प्रष्ट पारेका छन् ।

सँगसँगै अलमुताइरीले घटना हुनुभन्दा ४ दिनअघि संलग्न दुई व्यक्तिमध्य एक जनाले आफूविरुद्ध व्यक्तिगत फेसबुकमा आफ्नो आलोचना र अपमान गर्दै स्ट्याटस लेखेको पनि प्रमाण पेश गरेका छन् । उनले उक्त लेखको ४ दिनपछि सोहि व्यक्तिबाट यस किसिमको घटना हुनुलाई संयोग मान्न सकिन्छ र भन्ने प्रश्न पनि गरेका छन् । उनले आफूविरुद्ध लेखेका उक्त लेखले पनि ति व्यक्तिले खराब मनासय बनाएको प्रष्ट हुने अलमुताइरीले जनाएका छन् ।

अलमुताइरीले अन्त्यमा आफूलाई यस्तो वातावरणमा काम गर्नबाट एन्फाकै पदाधिकारीबाट सुरक्षा नभएको पनि बताएका छन् । एन्फाकै वरिष्ठ उपाध्यक्ष र उपाध्यक्षले सार्वजनिक रुपमा नै सामाजिक संजालमा आफू विरुद्ध भएको घटनामा विपक्षीको साथ दिँदै प्रतिक्रिया दिँदा थप असुरक्षित महसुस गरेको बताएका छन् । उनले अक्टोबरमा हुने साफ च्याम्पियनसिप अघि यस्तो कति घटनाको सामना गर्नुपर्ने हो वा व्यक्तिगत सुरक्षाको प्रत्याभूति हुन सक्ने वा नसक्नेबारे पनि प्रश्न उठाएका छन् ।

यस्तो थियो अलमुताइरीले एन्फालाई दिएको निवेदन :