एजेन्सी – गत सिजनको स्पेनिस ला लिगा च्याम्पियन एट्लेटिको म्याड्रिडले ब्राजिली फरवार्ड म्याथिअस कुन्हालाई क्लबमा अनुबन्ध गर्न सफल भएको छ ।

एट्लेटिकोले २२ वर्षीय युवा फरवार्डलाई जर्मन बुन्डेसलिगा क्लब हर्था बर्लिनबाट ५ वर्षको लागि २६ मिलियन युरोमा क्लबमा आबद्ध गर्न सफल भएको हो ।

इटालियन क्लब फियोरेन्टिनाका डुसान भ्लाहोभिकलाई अनुबन्ध गर्ने प्रयास गरेपनि सहमति जुट्न नसक्दा एट्लेटिकोले कुन्हालाई आबद्ध गरेको हो । कुन्हाले पहिलो रोजाईमा पर्न लुइस सुआरेजसँगै एन्जल कोरेआ र जोआओ फेलिक्ससँग प्रतिस्पर्धा गर्नुपर्ने हुन्छ ।

कुन्हा १८ वर्षको उमेरमा स्वीस क्लब सिओनमा आबद्ध भएका थिए । त्यसपछि उनी १५ मिलियन युरोमा जर्मन क्लब आरबी लाइप्जिगमा पुगेका थिए । करिब १८ महिना लाइप्जिग बसाईपछि उनी हर्था बर्लिन पुगेका थिए ।

कुन्हा शानदार गोलकर्ता नरहेपनि उनी असिस्ट दिन माहिर छन् । लाइप्जिगमा विरलै अवसर पाएका कुन्हाले हर्था आएको पहिलो सिजन नै ११ खेलमा ५ गोल गरेका थिए । गत सिजन उनले २८ खेलमा ८ गोल गर्नुका साथै ५ असिस्ट दिएका थिए ।

कुन्हा यसै महिना (अगस्ट) मा सम्पन्न भएको टोकियो ओलम्पिक २०२० मा पुरुष फुटबलमा ब्राजिलले स्वर्ण जित्दा टोलीमा सदस्य थिए । उनले ५ खेलमा ३ गोल गरेका थिए ।