एजेन्सी – गोल मेसिन पोलिस फरवार्ड रोबर्ट लेवान्डोस्कीले ह्याट्रिक पुरा गरेपछि बायर्न म्युनिखले जर्मन बुन्डेसलिगामा हर्था बर्लिनमाथि सानदार जित निकालेको छ ।

घरेलु मैदानमा थोमस मुलर र जमल मुसिएलाले गोल थपेपछि बायर्नले हर्था बर्लिनमाथि ५–० को फराकिलो जित आत्मसात गरेको हो । एलिएन्ज एरिना म्युनिखमा बायर्नले खेलको छैटौं मिनेटमा थोमस मुलरको गोलबाट अग्रता लिएको थियो ।

उनले अलफन्सो डाभिसको पासमा गोल गरेका थिए । ३५औं मिनेटमा लेवान्डोस्कीले गोल गर्दै बायर्नलाई पहिलो हाफमा २–० को अग्रता दिलाए । ४९औं मिनेटमा जमल मुसिएलाले थोमस मुलरको पासमा गोल गरेपछि बायर्नले खेलमा ३–० को आरामदायी अग्रता बनायो ।

७०औं मिनेटमा लेवान्डोस्कीले व्यक्तिगत दोस्रो तथा टोलीका लागि चौथो गोल गरेपछि बायर्न फराकिलो जिततर्फ अग्रसर बन्यो । उनले लिरोए सानेको पासमा गोल गरेका थिए ।

८४औं मिनेटमा लेवान्डोस्कीले टांगी निएनजोउको पासमा गोल गर्दै ह्याट्रिक पुरा गर्दै बायर्नलाई ५–० को सानदार जित दिलाए । जारी सिजनमा लेवान्डोस्कीको यो पहिलो ह्याट्रिक हो । लेवान्डोस्कीले यो सिजनको तीन खेलमा आफ्नो गोलसंख्या ५ पु¥याइसकेका छन् ।

जितसँगै अपराजित रहेको बायर्न ३ खेलबाट ७ अंक जोड्दै बुन्डेसलिगाको दोस्रो स्थानमा उक्लिएको छ । समान ७ अंक नै रहेपनि बायर लिभरकुसन गोलअन्तरमा शीर्षस्थानमा रहेको छ । पराजित हर्था बर्लिन अंकविहीन हुदै पुछारमा छ ।

अन्य नतिजा
एफसी कोल्नविरुद्ध बोचुम (२–१)
अर्मेनिया विलेफिल्डविरुद्ध फ्रान्कफुर्ट (१–१)
अग्सवर्गविरुद्ध बायर लिभरकुसन (१–४)
माइन्जविरुद्ध ग्रिउथर फुर्थ (३–०)
स्टुटगार्टविरुद्ध फ्रेइवर्ग (२–३)