एजेन्सी – ब्राजिलियन डिफेन्डर थियागो सिल्भाले आफ्नो पूर्व क्लब पेरिस सेन्ट जर्मेन (पिएसजी) ले स्पेनिस डिफेन्डर सर्जियो रामोसलाई अनुबन्ध गरेकोमा असन्तुष्टि जनाएका छन् ।

गत सिजन पिएसजीले नयाँ सम्झौता नदिएपछि सिल्भाले क्लब छाडेका थिए । सिल्भाकै कप्तानीमा पिएसजीले च्याम्पियन्स लिगको फाइनलसम्म यात्रा तय गरेको थियो । फाइनलमा बायर्न म्युनिखसँग पराजित भएपछि पिएसजी पहिलो पटक उपाधि जित्नबाट बन्चित भएको थियो । उक्त खेलसँगै सिल्भाको पिएसजी यात्रामा पनि पूर्णविराम लागेको थियो ।

पिएसजीले सिल्भालाई उमेर बढ्दै गएको भन्दै नयाँ सम्झौता दिएको थिएन । सिल्भाले त्यसपछि फ्री ट्रान्सफरमा चेल्सीसँग सम्झौता गरेका थिए । चेल्सी आएपछि आफ्नो उच्च प्रदर्शनलाई निरन्तरता दिएका उनले लन्डन क्लबसँग भने च्याम्पियन्स लिग जित्न सफल रहे । उनले पिएसजीमा सँगै रहेका थोमस टुचेलसँग उपाधि जितेका थिए ।

तर पिएसजीले यसपटक ट्रान्सफरमा सर्जियो रामोसलाई दुई वर्षको सम्झौतामा अनुबन्धन गरेपछि भने सिल्भाले आफूलाई निकै दुख लागेको बताए । ‘मलाई सर्जियो रामोससँग कुनै समस्या छैन । तर सर्जियोलाई जुन उमेरमा २ वर्षको सम्झौता दिइएको छ, म दुई वर्षअघि त्यहि अवस्थामा थिएँ,’ उनले भने, ‘यसले मलाई निकै नराम्रो लग्यो । मैले यसबारे पिएसजीको कोहिसँग कुरा गरेको छैन किनकि यसबाट मैले क्लबलाई कुनै योगदान नगरेजस्तो लागिरहेको छ ।’

‘मैले क्लब छाडेपछि त्यसलाई बिर्सेर अघि बढिसकें । तर यसो भनिरहँदा मैले त्यसबेला के भयो भन्ने पनि सोच आउँछ । त्यसबेला अरु विकल्प पनि थिए कि भन्ने लाग्छ,’ उनले थपे ।

‘मैले पिएसजीमा ८ दिन वा ८ महिना होइन, मेरो करिअरको ८ वर्ष बिताएँ । त्यो समयमा हामीले थुप्रै उपाधि जित्यौं र क्लबमा आमुल परिवर्तन पनि आयो । हामीले मिहिनेत गरेर नै अहिले पिएसजी यो स्तरमा छ ।’

‘म पिएसजीले जितोस् भन्ने कामना गर्छु किनकि क्लब त्यो सम्मानको हकदार छ । तर अहिले फर्केर हेर्दा त्यसबेला मेरो हकमा केहि फरक निर्णय हुन सक्थ्यो भन्ने लाग्छ ।’