एजेन्सी – महिनौं लामो छलफल पछि पनि पेरिस सेन्ट जर्मेन (पिएसजी) का युवा स्टार केलियन एमबाप्पे रियल म्याड्रिड जाने नजाने तय भएको छैन । सरुवा बजार बन्द हुन केहि घण्टामात्र बाँकी रहँदा रियलका समर्थकले एमबाप्पे आबद्ध हुने आशा छाडिसकेकेको अनुमान गरिएको छ ।

यद्दपी रियल भने अझै पनि एमबाप्पेलाई यहि सिजन क्लबमा भित्र्याउनका लागि दृढ देखिएको छ । त्यसका लागि समय भने धेरै बाँकी रहेको छैन । अन्तिम समयसम्म पनि सम्झौता हुनेमा टोली आशावादी देखिएको छ । अन्तिम दिन भएकाले सम्झौताका लागि केहि जटिलता पनि देखिएको छ ।

एमबाप्पे अनुबन्धमा सफल हुन नसकेपनि पिएसजीले भित्राउनका चाहेका फ्रान्सेली युवा मिडफिल्डर इडिवार्डो कामाभिङ्गा रियल आबद्ध हुने क्रममा रहेका छन् । त्यसमा पिएसजीको प्रतिक्रिया कस्तो रहन्छ भन्ने चासो छ ।

यसपटकको युरोपेली ट्रान्सफर बजार मंगलबार मध्यरातमा बन्द हुनेछ । त्यसैले आउने केहि घण्टा एमबाप्पे र रियलका लागि महत्त्वपूर्ण हुनेछ । रियलका प्रतिनिधिले सोमबार पिएसजीका अधिकारीहरुसँग छलफल गरेपनि सहमति हुन सकेन । रियलका अध्यक्ष फ्लोरेन्टिनोले १ सय ७० मिलियन र थप १० मिलियनबाहेक अर्को प्रस्ताव नगर्ने बताएका छन् ।

रियल अब फ्रान्सेली टोलीको प्रतिक्रिया कुरिरहेको छ । यदि यो पटक सम्भव भएन भने पनि अर्को वर्ष एमबाप्पेको सम्झौता सकिएपछि भित्राउनेमा रियल पुग्न सक्नेछ । यसका लागि रियलले जनवरीमा नै एमबाप्पेसँग सम्झौता गरेर जुनमा अनुबन्ध गर्न पाउनेछ ।

एमबाप्पे छाड्न चाहन्छन्

एमबाप्पेले आफूले रियल जान चाहेको बताइसकेका छन् । उनी पनि मंगलबारको अवस्था धैर्यतापूर्वक पर्खिरहेका हुनेछन् । तर पिएसजी भने अझै पनि उनलाई मनाउन सकिन्छ कि भन्नेमा आशावादी छ ।

यदि सम्झौता सम्भव भएन भने पनि एमबाप्पे र रियल धेरै चिन्तित हुने छैनन् । एमबाप्पलेले पिएसजीका लागि गोल गरिरहने छन् । अहिले सम्भव नभएपनि अर्को वर्ष एमबाप्पेलाई भित्राउन सकिनेमा रियल ढुक्क छ । एमबाप्पेले पिएसजीका नविकरणका लागि गरेको अहिले सम्मको सबै प्रस्ताव अस्वीकार गरिसकेका छन् ।

त्यसका आधारमा पनि रियल यसपटक नभएपनि अर्को पटक उनलाई भित्राउन सकिन्छ भन्नेमा विश्वस्त छ । मंगलबार मध्यरातमा सहमति हुन सकेन भने एमबाप्पले जनवरीमा रियलसँग पूर्व सम्झौता गर्न सक्नेछन् । त्यसपछि कम्तीमा २०२२-२३ को सिजन पछि पाँच वा त्यो भन्दा बढी वर्ष उनी रियलमा हुनेछन् ।