एजेन्सी – फ्रान्सका युवा मिडफिल्डर एडुआर्डो कामाभिंगा स्पेनिस क्लब रियल म्याड्रिडमा अनुबन्धित भएका छन् । रियल म्याड्रिडले फ्रान्सेली क्लब रेन्नेसबाट उनलाई ६ वर्षको सम्झौतामा अनुबन्ध गरेको हो ।

रियलले कामाभिंगा अनुबन्धका लागि ३० मिलियन युरोको हाराहारीमा खर्च गरेको बुझिएको छ । फ्रान्सकै शीर्ष क्लब पेरिस सेन्ट जर्मेन (पिएसजी) ले पनि उनलाई अनुबन्ध गर्ने प्रयास गरेको थियो । तर रियलले पिएसजीलाई पछि पार्दै १८ वर्षीय मिडफिल्डरलाई अनुबन्ध गर्न सफल रहयो ।

कामाभिंगाले फ्रान्सको सिनियर टोलीबाट पनि खेलिसकेका छन् । सन् २०२७ सम्मका लागि अनुबन्धित उनले रियलको सिनियर टोलीबाट नै खेल्नेछन् । प्रशिक्षक कार्लो एन्सेलोटिले उनलाई आफ्नो योजनामा राख्ने बुझिएको छ ।

सेन्टर मिडफिल्डमा हाल क्यासेमिरो, टोनी क्रुस, लुका मोड्रीच, फेडे भालभेर्डे र ड्यानी सेबालोस खेलिरहेका छन् । कामाभिंगाको आगमनसँगै सेबालोसले भने अन्यत्र जाने सम्भावना छ । रियल बेटिसले उनलाई अनुबन्ध गर्ने प्रयास गरेको थियो । उनले गत सिजन आर्सनलबाट लोनमा खेलेका थिए ।

१८ वर्षीय कामाभिंगाले फ्रान्सको शीर्ष लिगमा ७० खेल खेलिसकेका छन् । उनले व्यावसायिक करिअरमा १ सय बढी खेल खेलेकाले भरपुर अनुभव बटुलेका छन् । फ्रान्सको राष्ट्रिय टोलीबाट खेल्ने सबैभन्दा कान्छा खेलाडी र गोलकर्ताको कीर्तिमान पनि उनकै नाममा रहेको छ ।