एजेन्सी – युवा स्टार केलियन एमबाप्पेका लागि रियल म्याड्रिडले ट्रान्सफर विन्डोको अन्तिम दिन २ सय २० मिलियनको प्रस्ताव राखेपनि पेरिस सेन्ट जर्मेन (पिएसजी) ले त्यसलाई जवाफ नफर्काएपछि एमबाप्पे फ्रान्सेली क्लबमा नै रहने पक्का भएको छ ।

फ्रान्सेली राष्ट्रिय टोलीबाट विश्वकप जितिसकेका २२ वर्षे फरवार्डलाई यसै सिजन क्लबबाट खेलाउने लक्ष्यका साथ रियलले यसअघिको भन्दा प्रस्तावित रकम बढाएको थियो । पिएसजीसँगको सम्झौताको अन्तिम सिजनमा रहेका एमबाप्पेलाई रियलले मोटो रकमको प्रस्ताव राखेपनि पिएसजीले पटक पटक अस्वीकार गरेको हो । पिएसजीले एमबाप्पलेलाई क्लबमै राख्न चाहिरहेको छ ।

रियलले यसअघि दुई पटक गरेको प्रस्ताव पनि पिएसजीले नकारेको थियो । अघिल्लो साता १ सय ६० मिलियन युरो र यसै साता १० मिलियन युरो थपेर रियलले प्रस्ताव गरेको थियो । तर, पिएसजीले दुवैमा सकारात्मक प्रतिक्रिया दिएन । पिएसजीले कुनै हालतमा एमबाप्पेलाई विक्री नगर्ने बताएको थियो । तर एमबाप्पेले आग्रह गरेपछि पिएसजीले रियलले आफ्नो सर्त मानेमात्र विक्री गर्ने अडान राखेको थियो ।

पिएसजीले एमबाप्पेलाई नयाँ सम्झौताका लागि पटक पटक प्रस्ताव राखेपनि उनी नविकरण गर्न चाहिरहेका छैनन् । एमबाप्पे रियल म्याड्रिड जानेमा दृढ छन् । यो सिजन सम्भव नभएर अर्को सिजन फ्रि ट्रान्सफरमा उनी रियल जाने योजनामा छन् । रियलले लामो समयदेखि उनलाई अनुबन्ध गर्न खोजेको थियो ।

एमबाप्पे पिएसजीमा रहने पक्का भएसँगै फ्रान्सेली टोलीको आक्रमण निकै बलियो हुने भएको छ । अर्जेन्टिनी फरवार्ड लिओनेल मेस्सीको आगमन र ब्राजिलियन फरवार्ड नेयमारसँग एमबाप्पेको साझेदारी निसंकोच विश्वकै उत्कृष्टमा पर्नेछ ।