एजेन्सी – खेलको अन्तिम समयमा दुवै टोलीले एक–एक गोल गरेपछि काजकस्तान र युक्रेनले कतार विश्वकप २०२२ अन्तरगतको युरोपियन छनोटमा रोमाञ्चक बराबरी खेलेका छन् ।

युक्रेनले खेलमा दुई पटक अग्रता लिएरपनि त्यसलाई जोगाउन नसक्दा घरेलु टोली काजकस्तानसँग २–२ गोलको रोमाञ्चक बराबरी खेल्दै अंक बाँडेका हुन् । घरेलु मैदानमा काजकस्तानका लागि दुवै गोल भालिउलिनले गरे । पाहुना टोलीका रोमन यारेमचुक र ड्यानिलो सिकानले गोल गरे ।

एस्टाना एरिना एस्टाना काजकस्तानमा बुधबार राति भएको समूह ‘डी’ को चौथो राउन्डको खेलको खेलको दोस्रो मिनेटमा नै रोमन यारेमचुकको गोलबाट युक्रेनले पहिलो हाफमा १–० को अग्रता लिएको थियो । ७४औं मिनेटमा रुस्लान भालिउलिनले गोल गर्दै घरेलु टोलीलाई खेलमा फर्काए ।

बराबरीतर्फ धकेलिएको खेलको अन्तिम समयमा सब्सिच्युट ड्यानिलो सिकानले गोल गर्दै युक्रेनलाई पुनः २–१ को अग्रता दिलाए । उनी ८२औं मिनेटमा इडुआर्ड सोवोलको स्थानमा मैदान छिरेका थिए । सिकानको गोल लगत्तै रुस्लान भालिउलिनले गोल गर्दै घरेलु टोलीलाई हारबाट जोगाए ।

यो बराबरीपछि समूह ‘डी’ मा युक्रेन ४ खेलबाट ४ अंक जोडेर दोस्रो स्थानमा यथावत रहेको छ । काजकस्तान २ अंकसहित तेस्रो स्थानम रहेको छ । अपराजित फ्रान्स ३ खेलबाट ७ अंक जोडेर शीर्षस्थानमा रहँदा फिनल्यान्ड २ अंकसहित तेस्रो तथा १ अंक जोडेको बोस्निया एन्ड हर्जगोभिना पुछारमा छ ।