एजेन्सी – फिफा विश्वकप कतार २०२२ को युरोपियन छनोटमा क्रोएसियाले स्लोभाकियामाथि १–० को झिनो जित निकालेको छ । स्लोभाकियामा शनिबार राति भएको खेलमा क्रोएसियाको जितमा मार्सेलो ब्रोजोभिकले खेल सकिन ४ मिनेट बाँकी रहँदा गरेको गोल नै पर्याप्त बन्यो ।

प्रतिस्पर्धात्मक खेलको तेस्रो मिनेटमा नै क्रोएसियाले आक्रमण बुन्दा मार्सेलो ब्रोजोभिकको प्रहारले पोस्टको दिशा लिन सकेन । २१औं मिनेटमा भ्लादिमर विसको प्रहार बाहिरिदा घरेलु टोली अग्रता लिनबाट चुक्यो । २६औं मिनेटमा घरेलु टोलीका रोबर्ट मार्कको प्रहार फितलो बन्यो ।

दोस्रो हाफमा पनि दुवै टोलीले गोलका केही अवसर सिर्जना गरेपनि सदुपयोग गर्न नसक्दा खेल बराबरीतर्फ लम्किएको थियो । तर निर्धारित समयको खेल सकिन चार मिनेट बाँकी रहँदा मार्सेलो ब्रोजोभिकले गोल गर्दै टोलीलाई महत्वपुर्ण ३ अंक दिलाए । यही समूहको अर्काे खेलमा रसियाले साइप्रसलाई २–० ले तथा स्लोभेनियाले माल्टालाई १–० ले पराजित गरेको छ ।

यो जितसँगै समूह ‘एच’ मा क्रोएसिया ५ खेलबाट १० अंक जोड्दै दोस्रो स्थानमा यथावत रहेको छ । समान १० अंक नै रहेपनि रसिया गोल अन्तरमा शीर्षस्थानमा रहेको छ । पराजित स्लोभाकिया ६ अंक जोडेर चौथो स्थानमा रहेको छ । स्लोभेनिया ७ अं जोडेर तेस्रो स्थानमा रहँदा माल्टा र साइप्रस समान ४ अक जोडेर पाँचौ र छैटौ स्थानमा रहेको छ ।

अन्य नतिजा
समूह ‘ए’
आयरल्यान्डविरुद्ध अजरवैजान (१–१)
सर्वियाविरुद्ध लक्जेमवर्ग (४–१)

समूह ‘डी’
फिनल्यान्डविरुद्ध काजकस्तान (१–०)
युक्रेनविरुद्ध फ्रान्स (१–१)

समूह ‘एफ’
फारोइ आइल्यान्डविरुद्ध डेनमार्क (०–१)
इजरायलविरुद्ध अष्ट्रिया (५–२)
स्कटल्यान्डविरुद्ध मोल्दोभा (१–०)

समूह ‘जी’
लात्भियाविरुद्ध नर्वे (०–२)
जिब्राल्टारविरुद्ध टर्की (०–३)
नेदरल्यान्ड्सविरुद्ध मोन्टेनेग्रो (४–०)

समूह ‘एच’
साइप्रसविरुद्ध रसिया (०–२)
स्लोभेनियाविरुद्ध माल्टा (१–०)
स्लोाकियाविरुद्ध क्रोएसिया (०–१)