एजेन्सी – ग्यारेथ बेलले विगतमा भन्दा यसपटक रियल म्याड्रिडमा सहज महसुस गरेको बताएका छन् । उनले क्लबमा आफ्नो लागि सकारात्मक वातावरण रहेको पनि सुनाए ।

वेल्सका कप्तान समेत रहेका बेलले टोटेनहममा एक वर्ष लोनमा बिताएकोले युरोपियन च्याम्पियनसिप २०२० का लागि मानसिक रुपमा निकै सहयोग गरेको बताएका छन् । ‘मलाई लाग्छ त्यहाँ गएपछि युरो कपमा मलाई मद्दत गर्यो’, उनले भने, ‘त्यसैको निरन्तरताका रुपमा यो रियलमा यो सिजन भइरहेको छ । यसपटक मैले पहिला भन्दा राम्रो वातावरण महसुस गरिरहेको छु ।’

बेलले खेलाडीले मानसिक रुपमा तयार हुन जरुरी रहेको पनि बताएका छन् । ‘मानसिक र शारीरिक रुपमा ठीक हुँदा प्रदर्शन पनि राम्रो गर्न सकिन्छ’, बेलले थपे, ‘म खेलिरहेको छु । खुसी पनि छु । जसले गर्दा पहिला भन्दा रियलमा खेल्दा सजिलो अनुभव गरिरहेको छु ।’

बेलले रियलका प्रशिक्षक कार्लो एन्सेलोटीसँगको सम्बन्ध राम्रो रहेको उल्लेख गर्दै सिजनको सुरुवात पनि राम्रो भएको बताएका छन् । ‘कार्लोसँग मेरो सधै सम्बन्ध राम्रो रहेको छ’, उनले भने, ‘तर फुटबलको टोलीमा पर्नका लागि सधै राम्रो खेल्नु पर्ने हुन्छ । यसपटक प्रि सिजन पनि राम्रो भयो भने सिजनको सुरुवात पनि । सधै राम्रो खेल्नु पर्छ र त्यसले दृष्टिकोष एकदम छिटो परिवर्तन हुन्छ ।’

युरोको समयमा बेलले फुटबलबाट छिट्टै सन्यास लिने भन्ने समाचार प्रकाशित भएका थिए । तर उनले अहिले सन्यासका विषयमा नसोचेको बताएका छन् । ‘जति बेला जुन जिम्मेवारीमा भइन्छ त्यसमा केन्द्रित हुनुपर्दछ । त्यसैले अन्य विषय नभनेकै राम्रो हुन्छ’, उनले भने, ‘मैले कहिले पनि सन्यासका बारेमा योजना बनाएको छैन । म त्यति बला युरोमा केन्द्रित हुन चाहन्छे । म थप केहि भन्न चाहन्न । त्यो जसरुरी पनि छैन ।’