एजेन्सी – दक्षिण अमेरिकी विश्वकप छनोटमा उरुग्वेले बोलिभियालाई पराजित गरेको छ । घरेलु मैदानमा सोमबार बिहान भएको खेलमा उरुग्वेले ४–२ को जित हात पारेको हो ।

उरुग्वेको जितमा जिओरजियान डि एरासकाइटाले दुई तथा फेडे भाल्भेर्डे र अगस्टिन अल्भारेजले समान एक गोल गरे । बोलिभियाका मार्सेलो मोरेनोले दुवै गोल गरेपनि हार टार्न सकेन ।

खेलको १५औं मिनेटमा जिओरजियान डि एरासकाइटाले गोल गर्दै उरुग्वेलाई १–० को अग्रता दिलाए । ३१औं मिनेटमा फेडे भाल्भेर्डेले गोल गर्दै उरुग्वेको अग्रता दोब्बर पारे । ४७औं मिनेटमा अगस्टिन अल्भारेजले गोल गरेपछि उरुग्वे फराकिलो जिततर्फ अग्रसर बन्यो ।

५९औं मिनेटमा मार्सेलो मोरेनोले गोल गर्दै खेललाई ३–१ को अवस्थामा ल्याए । ६७औं मिनेटमा जिओरजियान डि एरासकाइटाले पेनाल्टीमार्फत गोल गर्दै खेललाई ४–१ ले अघि बढाए । ८४औं मिनेटमा मार्सेलो मोरेनोले पेनाल्टीमार्फत गोल गरेपनि उरुग्वे विजयी हुन सफल भयो ।

यो जितपछि उरुग्वे ८ खेलबाट १२ अंक जोडेर चौथो स्थानमा उक्लिएको छ । पराजित बोलिभिया ६ अंक जोडेर नवौं स्थानमा छ । दक्षिण अमेरिकी छनोटमा सात खेलमा शतप्रतिशत जित निकालेको ब्राजिल २१ अंक जोडेर शीर्षस्थानमा रहेको छ । अपराजित रहेको अर्जेन्टिना १५ अंक जोडेर दोस्रो स्थानमा रहेको छ ।

ब्राजिल रअर्जेन्टिनाबीचको खेल सातौ मिनेटमा नै रद्ध हुन पुगेको थियो । अर्जेन्टिनी खेलाडीले कोभिड –१९ को आवश्यक स्वास्थ्य मापदण्ड पुरा नगरेको भन्दै ब्राजिलको स्वास्थ्य अधिकारी नै खेल रोक्न मैदान प्रवेश गरेको थियो । त्यसपछि खेल सुचारु हुन सकेन ।

अन्य नतिजा
ब्राजिलविरुद्ध अर्जेन्टिना (सातौ मिनेटमा रद्ध)
इक्वेडरविरुद्ध चिली (०–०)
पाराग्वेविरुद्ध कोलम्विया (१–१)
पेरुविरुद्ध भेनेजुएला (१–०)

यसअघि प्रकाशित समाचारमा बोलिभियालाई हुनुपर्नेमा अन्यथा हुन गएकोमा सच्याइएको छ । सम्पादक