एजेन्सी – क्याटलान क्लब बार्सिलोनाका फरवार्ड मेम्फिस डिपाएले ह्याट्रिकसहित एक गोलको लागि असिस्ट दिएपछि नेदरल्यान्ड्सले फिफा विश्वकप कतार २०२२ को युरोपेली छनोटमा सानदार जित दर्ता गरेको छ ।

घरेलु मैदान योहान क्रुएफ एरिना आम्स्टर्डममा मंगलबार राति भएको खेलमा डच टोलीले १० खेलाडीमा समेटिएको टर्कीमाथि ६–१ को फराकिलो जित निकालेको हो । डेभी क्लासेन, गुस टिल र डोनेल मालेनले समान एक गोल गर्दा सेन्गुइज अन्डरले एक गोल फर्काए ।

खेलको पहिलो मिनेटमा नै डेभी क्लासेनले मेम्फिस डिपाएको पासमा गोल गर्दै घरेलु टोलीलाई १–० को अग्रता दिलाए । १६औं मिनेटमा डेभी क्लासेनको पासमा मेम्फिस डिपाएले गोल गर्दै टोलीको अग्रता दोब्बर पारे । ३८औं मिनेटमा डिपाएले पेनाल्टीमा गोल गर्दै नेदरल्यान्ड्सलाई पहिलो हाफमा ३–० को अग्रता दिलाए ।

काग्लर सोयुन्कुले पेनाल्टी बक्समा क्लासेनमाथि अनावश्यक फल गरेपछि रेफ्रीले डच टोलीलाई पेनाल्टी प्रदान गरेको थियो । यसपटक रातो कार्डबाट बचेका सोयुन्कुले ४४औं मिनेटमा डिपाएमाथि उस्तै फल गरेपछि दोहोरो पहेलो कार्ड खाँदै मैदानबाट बाहिरिएपछि टर्की पहिलो हाफमै १० खेलाडीमा समेटिएको थियो ।

५४औं मिनेटमा मेम्फिस डिपाएले स्टेभन वर्ग हइसको पासमा ह्याट्रिक पुरा गरेपछि घरेलु टोलीले खेलमा ४–० को आरामदायी अग्रता लियो । ८०औं मिनेटमा सब्सिच्युट गुस टिलले गोल गर्दै खेललाई ५–० को अवस्थामा ल्याए । ९०औं मिनेटा डोनेल मालेनले गोल गर्दै डच टोलीको जित पक्का गरे । इन्ज्युरी समयको थप गरिएको दोस्रो मिनेटमा सेन्गुइज अन्डरले गोल गर्दै खेललाई ६–१ को अवस्थामा ल्याएपनि हार टार्न सकेन ।

यो जितसँगै समूह ‘जी’ मा नेदरल्यान्ड्स ६ खेलबाट १३ अंक जोडेर शीर्षस्थानमा यथावत रहेको छ । समान १३ अंक नै रहेपन गोलअन्तरमा नर्वे दोस्रो स्थानमा छ । पराजित टर्की ११ अंक जोडेर तेस्रो स्थानमा झरेको छ ।

यही समूहको अर्काे खेलमा नर्वेले जिब्राल्टारमाथि ५–१ को फराकिलो जित दर्ता गर्दा मोन्टेनेग्रो र लात्भियाले गोलरहित बराबरी खेल्दै अंक बाँडेका छन् । मोन्टेनेग्रो ८ अंक जोडेर चौथो स्थानमा रहँदा लात्भिया ५ अंक जोडेर पाँचौ स्थानमा रहेको छ । जिब्राल्टारले अंकको खाता खोल्न सकेको छैन ।