एजेन्सी – फरवार्ड मोइस किनले दुई गोल तथा अर्का फरवार्ड फेडरिको बर्नरडेस्चीले दुई असिस्ट दिएपछि युरोपेली च्याम्पियन इटालीले फिफा विश्वकप कतार २०२२ को युरोपियन छनोटमा सानदार जित दर्ता गरेको छ ।

घरेलु मैदानमा इटालीले लिथुआनियामाथि ५–० को फराकिलो जित आत्मसात गरेको हो । मापी स्टेडियम इटालीमा बुधबार राति भएको खेलमा इटालीको फराकिलो जितमा मोइस किनले दुई तथा जियाकोमो रास्पाडोरी र जियोभानी डि लोरेन्जोले समान एक गोल गरे । एक गोल उपहार पाएको थियो ।

खेलको ११औं मिनेटमा मोइस किनको गोलबाट इटालीले गोलको खाता खोलेको थियो । १४औं मिनेटमा इडगारास उटकुसले आत्मघाती गोल गरेपछि इटालीले २–० को अग्रता बनायो । २४औ मिनेटमा जियाकोमो रास्पाडोरीले गोल गर्दै इटालीलाई ३–० ले अघि बढाए ।

मोइस किनले २९औं मिनेटमा फेडरिको बर्नरडेस्चीको पासमा व्यक्तिगत दोस्रो तथा इटालीको लागि चौथो गोल गरेपछि इटालीको खेलको २९ मिनेटभित्र नै ४–० को आरामदायी अग्रता लिएको थियो । ५४औं मिनेटमा जियोभानी डि लोरेन्जोले फेडरिको बर्नरडेस्चीको पासमा गोल गर्दै इटालीलाई ५–० को सानदार जित दिलाए ।

यही समुहको अर्काे खेलमा नर्दन आयरल्यान्ड र स्वीट्जरल्यान्डले गोलरहित बराबरी खेल्दै अंक बाँडेका छन् । यो जितसँगै इटालीले समूह ‘सी’ मा ६ खेलबाट १४ अंक जोडेर आफ्नो शीर्षतालाई यथावत राखेको छ ।

लिथुआनियाले अंकको खाता खोल्न सकेको छैन । दुवै टोलीले समान ४ खेलबाट स्वीट्जरल्यान्ड ८ अंक जोडेर दोस्रो स्थानमा रहँदा नर्दन आयरल्यान्ड ५ अंक जोडेर तेस्रो स्थानमा रहेको छ । बुल्गेरियाको पनि ५ अंक छ ।