काठमाडौं (हाम्रो खेलकुद) – फरवार्ड सविता राना मगर र मिडफिल्डर प्रीति राईले डेब्यु गरेको खेलमै गोल गरेपछि नेपालले बंगलादेशसँगको अन्तर्राष्ट्रिय मैत्रीपुर्ण खेलको पहिलो हाफमा अग्रता लिएको छ ।

त्रिपुरेश्वरस्थित दशरथ रंगशालामा बिहीबार भएको खेलमा नेपालले बंगलादेशी महिला टोलीविरुद्ध २–० को अग्रता लिएको हो । खेलको १३औं मिनेटमा सविताले गोल गर्दै नेपाललाई सुरुवाती अग्रता दिलाएका हुन् । बिमला चौधरीको क्रसलाई सविताले बंगलादेशकी गोलरक्षक रुप्ना चक्मा र डिफेन्डरलाई बिट गर्दै हेडर मार्फत बललाई जोली चुमाएकी थिइन् ।

२३औं मिनेटमा डेब्यु सब्सिच्युट मिडफिल्डर प्रीति राईले गोल गर्दै नेपालको अग्रता दोब्बर पारिन् । सरु लिम्बुले दिएको चलाखीपुर्ण पासमा प्रीतिले एक डिफेन्डरलाई बिट गर्दै पेनाल्टी बक्सबाहिरबाट गोलरक्षक रुप्ना खातुन अघि बढेको अवस्थामा सहजै फिनिस गरेकी थिइन् । दोस्रो हाफको खेल केहीबेरमा सुरु हुने छ ।

राष्ट्रिय टोलीले फिफा क्यालेन्डरमा पहिलोपल्ट दशरथ रंगशालामा खेल्ने अवसर पाउदा सविता र प्रीतिले पहिलो रोजाईमा खेल्दै सिनियर राष्ट्रिय टोलीमा डेब्यु गरेकी हुन् ।

उमेर समूहबाट नेपालको प्रतिनिधित्व गरिसकेकी रौतहटकी सविताले पछिल्लो महिला राष्ट्रिय लिगमा प्रभाव जमाएपछि पहिलोपटक राष्ट्रिय टोलीको बन्द प्रशिक्षणमा परेको पहिलो अवसरमै राािष्ट्रय टोलीबाट खेल्ने अवसर पाएकी हुन् ।

उमेर समूहको नेपाली राष्ट्रिय टोलीबाट खेलिसकेकी प्रीतिले उमेर समूहमा कप्तानीसमेत गरिसकेकी छिन् । गत सिजनदेखि विभागीय नेपाल एपिएफ क्लबबाट व्यवसायिक खेल खेलिरहेकी छिन् । उनी १३औं सागको बन्द प्रशिक्षणमा परेपनि अन्तिम टोलीमा पर्न सकेको थिएन् ।
एसियन कप छनोटको तयारीलाई यो मैत्रीपुर्ण खेल खेलिएको हो ।