एजेन्सी – रियल मलोर्कामाथि सहज जित दर्ता गर्दै एथ्लेटिको बिल्वाओ स्पेनिस ला लिगाको शीर्षस्थामा उक्लिएको छ । घरेलु मैदानमा मलोर्कालाई २–० ले पराजित गर्दै अपराजित रहेको बिल्वाओ शीर्षस्थानमा उक्लिन सफल भएको हो ।

बिल्वाओले एक खेल कम खेलेका रियल म्याड्रिड, सेभिया, भ्यालेन्सिया, बार्सिलोना र एट्लेटिको म्याड्रिडसँगै मलोर्कालाई पनि पछि पार्दै शीर्षस्थानमा उक्लिन सफल भएको हो ।

बिल्वाओको ४ खेलबाट ८ अंक पुगेको छ । एक खेल कम खेलेका यि ५ टोलीको समान ७ अंक छ । चार खेल खेलेको मलोर्काको पनि ७ अंक नै छ । सान मामेस वारिया बिल्वाओमा घरेलु टोलीको जितमा ड्यानियल भिभिएन र इनाकी विलियम्सले गोल गरे । दुवै गोल दोस्रो हाफमा सम्भव भएको थियो ।

६८औं मिनेटमा इकर म्युनिएनको पासमा ड्यानियल भिभिएनले गोल गर्दै घरेलु टोलीलाई १–० को अग्रता दिलाए । ७४औं मिनेटमा इकर म्युनिएनकै पासमा इनाकी विलियम्सले गोल गर्दै बिल्वाओको जित पक्का गरे । अपराजित रहेको बिल्वाओले समान दुई जित र दुई बराबरीको नतिजा निकालेको छ ।

यस्तै लेभान्टे र रायो भालेकानोले १–१ गोलको बराबरी खेल्दै अंक बाँडेका छन् । भिल्लारियल र डिपोर्टिभो एलाभेस तथा सेभिया र बार्सिलोनाबीचको खेल यसअघि नै स्थगित गर्ने निर्णय भएको थियो ।

नेपालमा ला लिगाको प्रत्यक्ष प्रसारण एक्सन स्पोर्ट्सले गर्दै आएको छ ।