एजेन्सी – आइभोरी कोस्टका फरवार्ड सेवास्टिन हल्लेरको ह्याट्रिकसहित चार गोल मद्दतमा डच क्लब आयाक्सले युइएफए च्याम्पियन्स लिगको समूह चरणको खेलमा सानदार जित निकालेको छ ।

आयाक्सले स्पोर्टिङ सिपीलाई उसकै मैदानमा ५–१ को फराकिलो हार चखाएको हो । स्टेभन वर्गहुइसले एक गोल थप्दा घरेलु टोलीका लागि पाउलिन्होको गोल सान्त्वना बन्यो । लिसवोआमा बुधबार राति भएको खेलको दोस्रो मिनेटमा नै सेवास्टिन हल्लेरको गोलबाट आयाक्सले अग्रता लिएको थियो ।

नवौं मिनेटमा एन्टोनीको पासमा हल्लेरले व्यक्तिगत तथा टोलीको लागि दोस्रो गोल गरे । ३३औं मिनेटमा पाउलिन्होले गोल गर्दै खेललाई २–१ को अवस्थामा ल्याए । ३९औं मिनेटमा स्टेभन वर्गहुइसले रायन ग्राभेनवर्चको पासमा गोल गरेपछि आयाक्सले पहिलो हाफमा ३–१ का आरामदायी अग्रता लिएको थियो ।

४७औं मिनेटमा स्पोर्टिङका पाउलिन्होले गोल गरेपनि भिएआरबाट मान्यता पाएन । उनी अफसाइड ठहरिए । ५१औं मिनेटमा सेवास्टिन हल्लेरले ह्याट्रिक पुरा गरेपछि आयाक्स फराकिलो जिततर्फ अग्रसर बन्यो । ६३औं मिनेटमा हल्लेरले व्यत्तिगत चौथो तथा टोलीका लागि पाँचौ गोल गर्दै आयाक्सलाई सानदार जित दिलाए ।

यही समूह ‘सी’ को खेलमा जर्मन क्लब बोरुसिया डर्टमुन्डले टर्किस क्लब बेसिक्टासलाई उसकै मैदानमा २–१ ले पराजित गरेको छ । डर्टमुन्डको जितमा जुडे बेलिङघम र एर्लिङ ब्राउट हालान्डले गोल गर्दा घरेलु टोलीका फ्रान्सिस्को मोन्टेरोले एक गोल फर्काए । यो नतिजापछि आयाक्स र डर्टमुन्डले समान ३ अंक जोडेका छने । बेसिक्टास र स्पोर्टिङ अंकविहीन बनेको छ ।

अन्य नतिजा
समूह ‘सी’
बेसिक्टासविरुद्ध बोरुसिया डर्टमुन्ड (१–२)
स्पोर्टिङ सिपीविरुद्ध आयाक्स (१–५)
समूह ‘डी’
एफसी सेरिफविरुद्ध साख्तर डोनेस्क (२–०)
इन्टर मिलानविरुद्ध रियल म्याड्रिड (०–१)
समूह ‘ए’
क्लब ब्रुगविरुद्ध पीएसजी (१–१)
म्यानचेस्टर सिटीविरुद्ध आरबी लाइप्जिग (६–३)
समूह ‘बी’
एट्लेटिको म्याड्रिडविरुद्ध एफसी पोर्टाे (०–०)
लिभरपुलविरुद्ध एसी मिलान (३–२)